Byen bonè jodi lendi 24 avril 2023 a, moun Kanapevè mete dife sou plis pase yon douzèn nèg ak zam lapolis te arete nan yon ti bis. Aksyon sila pase nan zòn komisarya Kanapevè a kote moun yo di yo pap kite moun sa yo chape poul yo.
Nan plizyè videyo k ap sikile sou entènèt la, nou kapab wè kòman nèg a zam sa yo pase anba flanm dife. Pou sa ki konsène chif viktim yo, enfòmasyon yo fè kwè gen 14 jèn gason ki kankannen, men tou temwen yo fè konnen se lapolis ki te rive met men sou yo avan popilasyon an te deside ki sò yo te rezève pou yo.
Nan yon lòt bò, aksyon sila pase pandan prezime bandi anvayi byen bonè jodi lendi a plizyè zòn nan Pòtoprens, tankou Tijo, Debisi, Pako, Kanapevè, Vilaj Jòj ak Site Solèy. Nan sans sa, moun ki rete nan zòn sa yo lanse yon SOS pou lapolis kapab vinn pote yo sekou anba men nèg ak zam sa yo k ap tire depi 1è nan maten.
Daprè plizyè moun k ap viv nan zòn sa yo, se ta nèg ki nan gwoup gang bèlè ak gwoup 5 Segonn nan ki dèyè atak sila. Pou kounya, selon kèk sous nou ka fè konfyans, gen sila yo ki di nou se nan kache yo ye e genyen tou ki fè n konprann se valiz yo y ap fè pou tante kite zòn kote yo ye a.
“Se pa de kout bal k ap chante, se valiz mwen m pral fè“, selon sa yon abitan nan zòn kanapevè fè n konnen.
N ap raple sa pa gen lontan depi gang te anvayi zòn Sous matla nan Kabarè, kote plizyè ti bebe ak granmoun te pèdi lavi nan lanmè akòz yo t ap tante sove lavi yo. Mete sou sa, plizyè lòt moun te tonbe anba bal, genyen ki blese, kay boule tout sa yo se akòz bandi ki nan gwoup kanaran ak Titanyen an.
Atik sa se pwopriyete prive ©️ Gwoup Medya MAGHAITI 2023
