Nan lannuit 2 Avril 2024 pou rive maten an, divès moun te kouri kite lakay yo akoz atak gwoup gang Chen Mechan an ki t ap eseye pran kontwòl Brigad Entèvansyon Motorize (BIM) nan zòn klèsin. Anplis de sa a gen plizyè kadav yo jwenn sou wout Taba a, selon Juno7.
«Popilasyon an mande pou otorite responsab yo vin leve kadav k ap bay move sant nan zòn Taba ak klèsin lan», se sa jounal la rapòte toujou.
Gwoup gang «Viv ansanm», ki gen ladan l gwoup gang Chen Mechan an, te fè atak sa a nan objektif pou yo te pran kontwòl sou-komisarya Taba a ak baz Brigad Entèvansyon Motorize (BIM) yèswa aprè plizyè S.O.S ki t ap sikile sou rezo sosyal yo. Pandan tan sa a gen anpil moun nan popilasyon an ki te kouri ak sèlman rad sou kò yo osnon kouche anba kabann aprè atak sa a.
Atak gwoup gang Chen Mechan an te fèt nan divès zòn kou Klèsin, Taba, jeral Batay, Fleryo, epi Ti Plas Kazo, kote te gen anpil kout bal ki t ap chante menm lakòz lanmò plizyè lòt moun, pandan nou poko ka rive bay bilan an.
Atik sa se pwopriyete prive ©️ Gwoup Medya MAGHAITI 2024
