Nan òdonans jij Walter Wesser Voltaire a ki te pibliye depi lendi 19 fevriye 2024 la, li fè konnen gen plizyè moun ki te reve pran plas ansyen prezidan Jovenel Moïse la. Konsa, nan plizyè pati nan rapò a, li montre klè te gentan gen divès klan ki te gentan fòme kont li pou pran pouvwa a nan men l.
Daprè ankèt yo, pastè Christian Emmanuel Sanon, se premye moun nan tout reyinyon ankachèt ki konn ap fèt nan bò pa l ki te toujou anonse se li k ap prezidan nan plas Jovenel Moïse la. Konsa, yo di tou se li menm menm ki te deklare se li k te rasanble asayan nasyonal epi entènasyonal yo, sa ki fè jij Voltaire ekri li se pi gwo sèvo nan ansasinay prezidan an. Sepandan, Joseph Vincent te fè konnen endividi sa yo ki se Ashkard Joseph ak Jocelyn Cadet te eksplike l se pòs premye minis yo t ap bay Sanon.
Dezyèm moun ki te gen lide pran plas prezidan an se ta ansyen jij kou kasasyon an, Windelle Coq Thelot. Selon temwanyaj pastè a, se moun li te gen bon relasyon ak li depi nan lane 2018. Majistra a di pi lwen “madanm sa te vle vinn prezidan Repiblik Dayiti aprè eliminasyon prezidan Jovenel Moïse “.
Alòske 2 moun sa yo te vle pou se yo ki pou prezidan, gen lòt moun se pito patizan yo yo te vle pran plas la. Selon òdonans la, sou pwen sa se Félix Badio ki te deklare li menm se enfiltre l te konn enfiltre konplotè yo, se pou sa li bay non kèk moun ki te gen pwòp klan yo pou rèv politik sa a.
“Jeantel Joseph te swete pou gen Smith Magny pou ranplase prezidan an, Rénald Luberus te vle gen Valbrun Lyonel ak Line Balthazar, pou Claude Joseph, Martine Moïse, Martine Moïse te vle tou Claude Joseph ak kondisyon pou remèt Martine Moïse pouvwa a aprè pwovizwa a epi lè krim nan finn fèt. Gary Bodeau te rele Anacacis pou di l <<nou pran l nou pran l nèt>>“, selon detay Badio bay sou klan moun sa yo pandan li te di tou madanm Thelot ak Francis Cinéus se tèt ki t ap panse pou konplo a.
Se menm jan an tou nou jwenn nan rapò majistra a, ansyen kòdonatè enfrastrikti palè nasyonal la, Ardouin Zéphirin li menm ki te nan klan ki te genyen Claude Joseph, Gary Bodeau, avèk ansyen premye dam nan, Marie Étienne Martine Joseph Moïse.
Atik sa se pwopriyete prive ©️ Gwoup Medya MAGHAITI 2024
