Plizyè moun nan laprès ak lòt òganizasyon foule beton an pou mande libere jounalis Jean Thony Lorthé jounen jodi madi 14 fevriye 2023 a, aprè kidnapin ki te fèt Laboul 12, nan dat 3 fevriye dènyè a.
Responsab nan òganizasyon sosyete sivil ak moun nan laprès te pote solidarite yo avèk jounalis vision 2000 la, kote nèg ak zam te kidnape li ansanm avèk 2 lòt moun, pandan li t ap eseye pase Laboul 12 pou li t al nan antèman yon manm nan fanmi li.
Mach pasifik sa te demare Pon Moren, pase devan Ministè Kominikasyon nan Bwa vèna pou rive Ministè Jistis ak Sekirite Piblik nan avni Chal Simè epi pou yo t al bout nan radyo “Vision 2000″.
Pandan, yo t ap mache yo te tou pwofite denonse ak kritike otorite bò isit akoz silans yo sou fenomenn kidnapin k ap fèt anndan peyi an, patikilyèman sou jounalis Jean Thony Lorthé.
N ap fè nou konnen inisyativ sa te pran sou do Rezo Nasyonal Gwoup Sangen Resis Negatif (RENAGSANG), puiske viktim Jean Thony Lorthé se pòt pawòl ladan li. Kidonk, Jounalis la gen 11 jou depi nèg ak zam kidnape li.
Atik sa se pwopriyete prive ©️ Gwoup Medya MAGHAITI 2023
Discussion about this post