Aprè gwo atak bandi ak zam finn fè sou penitansye nasyonal ayè samdi a, Kolektif Avoka yo Pou Defans Dwa Moun(CADDHO) fè konnen jodi dimanch 3 mas 2024 la, gen plis pase 3500 prizonye ki sove kite prizon an. Nan yon premye tan, selon sa Me Arnel Rémy te pibliye sou kont X li, li te fè konprann kantite moun ki rete anndan an pa menm depase 100 prizonye menm.
“Nan moman nap pale la anndan penitansye CADDHO resanse anviwon 99 prizonye ki rete ki pat deside lage pye yo. Avan prizon an te kraze se 3696 prizonye ki te genyen. Chif nou genyen sou efektif prizonye ki sove se 3597“, se sa defansè dwa moun nan ekri nan yon lòt pòs li apènn fè. Yon lòt kote, selon jounal Reuters ki pale ak divès moun anndan prizon an jodi dimanch la, se ta egzakteman 99 prizonye ki rete.
“Mwen pa konnen konbyen moun ki mouri. Men sèl sa m konnen se sèlman 99 prizonye ki rete” selon sa yo rapòte sou deklarasyon yon ajan k ap travay anndan pi gwo prizon peyi a genyen.
Mete sou dividal prizonye sa yo ki sove kite prizon an, ta gen divès lòt ki yo menm jwenn lanmò yo pandan yo t ap eseye sove kite espas la. Se konsa tou, gen divès nan yo ki ta resevwa plizyè bal toujou pandan yo menm tou yo t ap tante kite lakou prizon an.
“Twa prizonye mouri pandan yo t ap tante sove kite prizon an. Mwen resevwa yon bal la e m pran youn pi wo toujou. M ap soufri anpil. Yon prizonye ki t ap eseye sove pou l ale te pran 2 bal li menm“, toujou daprè sa sous Reuters yo fè konnen.
Atik sa se pwopriyete prive ©️ Gwoup Medya MAGHAITI 2024
