Aprè gwo evazyon ki fèt nan Penitansye Nasyonal Dayiti parapò avèk atak divès gwoup gang nan peyi a te fè, jounen jodi dimanch 3 mas 2024 la, sou lòd wo kòmandan militè ak manm lame repiblik Dominikèn ak Kò Espesyalize pou Sekirite Fwontyè Terès (CESFRONT)yo, yo gentan pran gwo dispozisyon pou siveye fwontyè Dominikèn nan, selon Jounal Listin Diario.
«Fwontyè yo ap rete sekirize avèk ranfòsman militè nesesè yo epi nou pral kontinye aplike mezi restriktif nesesè yo», selon jeneral Brigade Freddy Sòti Thormann, rapòte nan jounal Listín Diario.
Anplis, li ajoute pou l di : “n ap mennen yon travay kwòdone ak pwòch kòmandan jeneral lame a, jeneral Carlos Fernández Onofre pou pwoteje fwontyè nou an”.
Plizyè prizonye te rive sove kite gran prizon nan Pòtoprens yèswa, kote anpil mouri pandan yo t ap eseye sove tou. Mete sou sa, anpil lòt ta sove ale refijye nan kan kèk gwoup gang nan peyi a.
Lame CESFRONT nan peyi Repiblik Dominikèn kontinye ap mete siveyans avèk patwouy nan tout zòn fwontalye yo pataje ak Ayiti yo pou evite kèk prizonye antre sou sòl lakay yo a.
Pandantan plizyè prizonye sove, okenn otorite nan Lapolis la poko bay konbyen ki sove ale epi konbyen ki mouri. N ap raple tou, se depi jedi 29 fevriye ki sot pase la, bandi te mete dwon ap siveye pi gwo prizon sivil nan peyi Dayiti a.
Atik sa se pwopriyete prive ©️ Gwoup Medya MAGHAITI 2024
