Nan yon rapò depatman jistis Ameriken an fè sòti ayè lendi 7 novanm 2022 a, yo devwale yon lis bandi yo akize nan kad kidnapin kèk sitwayen Ameriken nan peyi Dayiti sòti nan lane 2021 pou rive 2022. Nan lis sa nou jwenn : Ti lapli, Manno, Jhon Peter Fleronvil, Jean Renald Dolcin, Yonyon ak Zo ki yo menm deja nan prizon.
Aprè depatman jistis Ameriken an apènn pwomèt 1 milyon dola $US pou moun ki ta ede yo jwenn enfòmasyon k ap penmèt yo arete oubyen kondane lanmò 100 jou, Vitelhomme epi Gaspiyay. Yo te tou pwofite pou sòti lis non 4 gang sa yo mete sou Joly Germine alyas Yonyon epi Jean Pelice alyas “Zo“. Ti lapli, Manno, Fleronvil epi Dolcin. Se non sa yo ki site nan dokiman sa a. Daprè sa depatman an fè konnen gang sa yo enplike nan dosye kidnapin sitwayen Ameriken nan peryòd janvye, fevriye 2021 epi jiyè 2022.
Nan yon bò, pou Renel Destina alyas “Ti lapli“, chèf gang Gran Ravin, akisazyon yo ale konsa ” Aktik akizasyon an, akize gang lan pou kidnapin yon viktim Ameriken ( yon fi) an fevriye 2021, li te kenbe li pandan anviwon 14 jou, pandan tout tan sa viktim lan te anba gwo menas zam” daprè sa ògan jistis Ameriken an fè konnen, yo soulinye resòtisan yo a te libere 16 fevriye 2021, aprè fanmi li te bay lajan pou sa.
Pou sak gen pou wè ak chèf gang Vilaj Dedye a, Emmanuel Solomon alyas “Manno”, li menm yo te depoze yon plent penal kont li, toujou pou kidnapin yon sitwayen Ameriken an janvye 2021. Daprè sa depatman lajistis la ekri, viktim lan pase anviwon 11 jou anba menas zam jiskaske zanmi ak fanmi li te voye lajan pou te libere l “, gang lan kenbe machin ak 2 telefonn viktim lan, yo te resi libere li nan dat 23 janvye 2021“, toujou daprè enfòmasyon depatman jistis Ameriken an pataje, ladan l yo panche sou chèf gang Manno ak kèk lòt gang ki toujou ap pataje eksplwa yo fè sou rezo sosyal yo.
Yon lòt bò, Jhon Peter Fleronvil ak Jean Renald Dolcin 2 chèf gang baz “kokorat san ras” akize tou, paske yo te enplike nan kidnapin 3 sitwayen Ameriken. Nan yon premye tan se te yon koup marye yo te pran, nan aprè demen, daprè depatman jistis Ameriken an, yo te kidnape yon lòt viktim ankò, ki pase 6 jou ansanm menm kote toujou anba menas. Kontrèman ak lòt viktim yo, lajistis peyi Etazini pa bay okenn enfòmasyon sou ki dat 3 moun sa yo te jwenn liberesyon yo, men se te toujou gras ak lajan yo te sòti anba men gang kokorat san ras yo, gen ladan yo lapolis Nasyonal Dayiti ta pral arete nan dat 11 septanm lan sou Fontyè peyi Repiblik Dominikèn lan.
Ògan jidisyè peyi Etazini an fè konnen, “akizasyon sa yo se zak ki ka verifye, yo mansyone chak grenn akize se yon prezime inosan jiskaske temwanyaj moun lan ta retire tout dout devan yon tribinal”, se sa yo ekri nan rapò yo pataje sou sit U.S Depatment of Justice la.
N ap raple deja gen 2 chèf gang baz 400 Mawozo(Yonyon ak Zo) ki deja nan men lajistis nan kad dosye sa. Anplis, gen yon ansanm responsab ki t ap founi je nan ankèt sa ki gen rapò ak gang ki enplike nan kidnapin resòtisan Ameriken nan peyi a. Ankèt sa te asire gras ak biwo lokal Biwo Federal Envestigasyon(FBI) nan tèt kole ak Polis Nasyonal Dayiti (PNH), pwokirè Ameriken adjwen, Karen Seifert, Jack Korba ak Britanny Keil nan distrik Kolombya ak espesyalis parajiridik Jorges Casillas epi pwokirè Ameriken espesyal, Beau Barnes, toujou pou distrik Kolombya.
Atik sa se pwopriyete prive ©️ Gwoup Medya MAGHAITI 2022