Nan divès kontwòl ki tanmen sou fwontyè nan bò ayisyen yo jodi vandredi 20 oktòb 2023 a, otorite lokal yo fè konnen yo entèdi kèlkeswa moun li ye a pou al achte machandiz Sendomeng pou travèse ak yo an Ayiti, si sa ta rive fèt y ap mete dife nan tout sa yo jwenn. Responsab yo fè deklarasyon sila aprè yo te finn sezi plizyè machandiz jodi a.
“Pa riske tèt nou al achte bagay Repiblik Dominikèn, ni pa pase nan dlo ak yo nou menm otorite nou pap akspte l. Nou ka konsidere kèk ka pou nou voye yo nan ladwàn men tout rès machandiz yo n ap boule yo“, se sa vis delege depatman nòdès la, Harold Joseph deklare.
Pou sa ki gen pou wè ak enfòmasyon ki fè kwè pòt la te louvri byen bonè vandredi sa, responsab yo rive demanti sa, kote yo fè konnen lapolis nan tèt kole ak Vis delege a ak tout meri Wanament la toujou kanpe pou anpeche moun yo antre ak machandiz.
“Pou ouvèti baryè a nou klè ladan l toutotan leta toulède peyi yo pa chita pou revandikasyon pa nou yo kit nan Wanament oubyen nan tout peyi a, baryè a ap rete fèmen, nou menm otorite lokal nou detèmine nan kesyon sa“, se sa ajan enterimè adjwen an, Osselite Destiné deklare pandan li tou anonse depi demen samdi a yo pap gen pitye pou pyès moun paske yo soulinye avèk mouvman sila se diyite nou y ap defann fas ak prezidan Luis Abinader.
Nan sa ki konsène mache fwontalye Wanament la, yo prezise aktivite yo kanpe akòz desizyon yo pran pou fèmen fwontyè a. Pa gen dat pou l ta relouvri men yo fè konprann se nan lide pou evite plis dega ki fè mache a pa kontinye fonksyone.
Atik sa se pwopriyete prive ©️ Gwoup Medya MAGHAITI 2023
