Aprè yo te finn libere li 7 septanm pase a, otorite amerikèn yo resi pèmèt ansyen senatè Grandans la, Guy Phillipe antre an Ayiti jodi jedi 30 novanm 2023 a. Selon Miami Herald, pa gen pyès moun ki te konnen si ansyen palmantè a t ap ateri nan peyi a puiske non l pa t pami moun depatman Leta ameriken t ap depote yo.
“Ofis Nasyonal Imigrasyon nan peyi Dayiti deklare nou, nan lis pasajè ki te gen vòl pou Pòtoprens jodia te sèlman gen 17 non depòte ki te vyole lalwa amerikèn sou imigrasyon“, se sa jounal ameriken an fè konnen pandan yo presize non Guy Phillipe pa t nan lis sa men li vini an Ayiti ak plizyè lòt moun nan yon vòl imigrasyon peyi Etazini ki te sòti Alexandria(Louisiane), e li te dekole nan 5è 57 nan maten.
Nan menm kad dosye sa, avoka ansyen palmantè a, Me Louicher Jean Joseph te fè konnen nan mikwo VOA kreyòl se gouvènman ayisyen an ki te bloke Guy Phillipe Etazini toujou, paske l te soulinye bò kote pa yo , yo te fè tout sa k depann bò kote yo pou te pèmèt li vini nan peyi l depi menm kote yo te libere li 7 septanm 2023 a. Se nan menm sans sa tou, li te deklare pèsonn moun pa t ap ka anpeche sitwayen an vini an Ayiti paske l estime kliyan li a te rive pase tan li te dwe pase nan prizon an.
N ap raple se jij Cécilia Altonaga ki te kondane Guy Philippe pou l pase 20 lane nan prizon pou blanchiman lajan ak trafik dwòg, men aprè jijman li te dwe pase 9 lane. Poutan, gras ak yon akò li te jwenn ak pwokirè federal yo lajistis amerikèn libere l aprè l te finn pase 6 lane nan prizon.
Atik sa se pwopriyete prive ©️ Gwoup Medya MAGHAITI 2023
