Omwen 89 moun mouri nan batay bandi G-9 ak G-Pèp ap fè Site Solèy la selon RNDDH

Jodi mèkredi 13 jiyè a._ Rezo Nasyonal Defans ak Dwa moun (RNDDH) sòti yon rapò sou batay ant 2 gwoup gang sa yo ki se G-9 an Fanmi & Alye kont G-Pèp depi mèkredi 7 jiyè 2022 nan anviwon 3è nan maten, presizeman nan katye “Brooklyn”, komin Site Solèy.

Selon rapò sa, li mansyone objektif atak sa: “se kraze fyèf ak retire gang nan Brooklyn lan, sa Gabriel Jean Pierre alyas Ti Gabriel oubyen Gabo nan tèt li a pou G-9 an Fanmi & Alye ka kontwole tout komin Site Solèy la“.

Toujou nan menm rapò sa, Rezo Nasyonal Defans ak Dwa moun prezante non plizyè bandi ak alye yo: “Chèf gang G-9 an Fanmi & Alye se Jimmy Cherizier alyas Barbecue ak plizyè akolit li yo, tankou Matyas Saintil nan Boston (Site Solèy), Andris Iscard nan Belekou (Site Solèy), Tyson Samedy nan Rakèt (Site Solèy), Serge Alectes alyas Ti Junior nan Lasalin, Micanor Altes alyas Monel Félix oubyen Monel Félix alyas Wa Mikanò, chèf gang Waf Jeremi epi Kenley nan Tokyo (Dèlma 2)”.

Anplis, gwoup gang G-9 an Fanmi & Alye te jwenn sipò materyèl Sant Nasyonal Ekipman (CNE) pou li te mennen operasyon li yo kont gang G-Pèp la.

Òganizasyon k ap defann dwa moun sa fè konnen gwoup Gang G-9 an Fanmi & Alye te kraze 127 kay avèk materyèl sa yo nan premye jou batay la, anplis li te asasine 8 moun ak blese 13 lòt moun. Nan demen 8 jiyè, 47 moun ta pral mouri, 16 ladan yo se manm G-Pèp epi ye kouri pran refij nan yon ti kannòt sou lanmè, kote ti Gabriel ta pral sove kèk nan yo. Toujou nan menm jou sa, G-9 an Fanmi & Alye te boule 21 moun, 8 moun te disparèt epi 39 te sòti blese.
Nan dat 9 Jiyè, 23 moun te rive asasinen ak 6 lòt te sòti blese toujou nan menm gè sa. Poutan nan dat 10 Jiyè 2022, 11 moun te pèdi lavi yo , presizeman 8 ladan yo se manm G-9 an Fanmi & Alye epi 16 te fini pa blese.

Lagè ant de (2) gwoup gang sa deja fè plizyè sitwayen kite lakay yo, aprè plizyè lanmò ak blese anrejistre nan kad batay sa, selon deklarasyon Majistra Joël Janéus, sou radyo Panèl Magik yè madi an.

Rezo Nasyonal Defans ak Dwa moun (RNDDH) pa sispann egzije prezans lapolis nan komin Site Solèy nan objektif pou frennen lagè nan mitan gang sa yo ak arete yo epi sove lavi popilasyon sivil k ap mande sekou depi kèk jou.

Atik sa se pwopriyete prive ©️ Gwoup Medya MAGHAITI 2022

Comments

commentaires