Timoun 12 lane, Jean Marson ROMÉLU alyas Tiga, te rive mouri akoz yon bal nan “Lafond”, ki se lokalite monn Oje, ki retwouve l nan vil Jakmèl, nan dat dimanch 19 J’en 2022. Krim sa se ta zak yon mesye ki rele Guivard Domond, ki fèt Jakmèl epi ki te sòti nan peyi lòtbò dlo, presizeman Etazini.
Zak sa te komèt akoz li t al vizite teren li, kote li te jwenn yon ti gason ki t ap keyi kèk mango nan espas sa.
Selon jounalis Élie Lorveus, sou radyo Karayib.
Pou n sinyale ajan Lapolis ak otorite jidisyè yo pa te pran tan pou yo te rive, aprè krim sa te fin fèt jis pou yo te fè konsta legal yo.
Pandan prezime kriminèl la te gentan kouri ak zam li, selon plizyè temwanyaj moun nan lokalite sa. Pou yo, prezime kriminèl sa abitye tire pou bon plezi li nan zonn lan.
Nan yon korespondans ki adrese ak plizyè responsab nan imigrasyon ak emigrasyon, komisè gouvènman nan Tribunal Premyè Enstans Jakmèl la (TPEJ), Mèt Lyonel Chérima, mande pou yo anpeche prezime kriminèl Guivard Domond kite peyi a, akoz li ta veritab sispèk nan lanmò ti pitit sa, Marson ROMÉLU, li pa gen dwa kite peyi a keseswa nan Avyon oubyen nan bato, si tout fwa yo ta jwenn li se pou yo arete l ak mennen li nan komisarya ki pi prè a pou lajistis ka aji.
Kidonk, (Organisation des coeurs pour le changement des Enfants Démunis d’Haïti/OCCED’H), di li kondane tout modèl zak sa yo k ap fèt sou timoun, pandan li tou pwofite voye senpati ak tout fanmi li epi zanmi Jean Marson ROMÉLU, epi li mande pou otorite konpetan pou pousuit kriminèl sa selon bon jan lalwa.
Atik sa se pwopriyete prive ©️ Gwoup Medya MAGHAITI 2022
