Nèg ak zam kidnape chèf pwotokòl palè nasyonal la

Moun yo pa rive idantifye kidnape ayè dimanch 19 fevriye 2023 a nan dèlma 31, chèf pwotokòl palè nasyonal, Marc Marie Yves Mazile ak tout chofè li. Daprè sa fanmi an fè konnen nan kèk medya lokal, sistèm lokalizasyon telefòn viktim nan ta fè kwè se nan 3yèm sikonskripsyon pòtoprens li ye.

Enfòmasyon yo fè kwè, nèg ak zam yo ta mete men sou gwo fonksyonè leta a ak tout chofè li, aprè yo ta finn depoze madan m Yves Mazile legliz, nan zòn dèlma 31, toujou daprè sa fanmi an temwanye.

Pou kounya, pa gen okenn detay ki disponib sou konbyen lajan kidnapè yo ta mande pou liberasyon 2 viktim yo.

N ap raple zak kidnapin yo pa sispann monte nan peyi a, kote gen plizyè moun ki viktim sitiyasyon sila a tankou ansyen palmantè, Louis Gérald Gilles ki nan men ravisè yo depi jedi ki te 16 fevriye 2023 a.

Atik sa se pwopriyete prive ©️ Gwoup Medya MAGHAITI 2023

Comments

commentaires