Aprè moman panik ki te gen nan zòn channmas, Kafou ayewopò ak kèk zòn nan Dèlma, nèg ak zam yo antre epi mete dife nan yon pati nan lekòl «Petit Séminaire Saint-Martial»(PSCSM) jodi lendi premye avril 2024 la. Selon divès imaj ki vin jwenn nou, endividi yo ta mete dife a kote espas enfòmatik lekòl la ta pran tou.
Yon sous nou ka fè konfyans rive konfime nou enfòmasyon an, sepandan li pa bay okenn lòt detay sou atak endividi ak zam yo fè sou lekòl sa pandan aprèmidi a. N ap fè konnen, depi jou ki te 29 fevriye a bal pa t sispann chante nan anviwon lekòl la kote elèv yo te jwenn anpil difikilte pou te kite espas la.
N ap soulinye, Lekòl Petit Séminaire Saint-Martial ki chita kò l nan ri Lama gen 159 lane depi l egziste. E se youn nan lekòl ki fòme sèlman gason nan peyi a depi egzistans yo.
Atik sa se pwopriyete prive ©️ Gwoup Medya MAGHAITI 2024
