Nan sousi pou enfòme popilasyon an, Ministè Sante Piblik ak Popilasyon(MSPP) anonse yo te rive sezi jou ki te vandredi 13 oktòb 2023 a, 27 pochèt san ki kontamine ak viris Sida epi epatit B. Ministè a fè konnen se sou zòn fwontyè a nan Wanament yo jwenn san pa bon sa yo.
Jan yo anonse l la, Ministè a k ap jere kesyon lasante nan peyi a fè konnen se aprè divès tès yo reyalize sou san sa yo, yo jwenn tout 27 sak san yo gen viris Sida ak epatit B nan yo. Konsa, otorite sanitè yo voye yon mesaj klè pou entèdi tout moun pou pa achete, pran san oubyen sèvi ak pwodui ki gen san nan yo e ki ta sòti nan lòt peyi.
Se nan sans sa tou, responsab yo mande pou tout moun nan popilasyon an rete veye tout pwodui sa yo, pandan yo konseye tout moun pou egzije pèsonèl k ap travay nan lopital yo fè bon jan verifikasyon sou tout san y ap itilize pou transmèt bay moun yo.
N ap soulinye ministè a pa bay okenn enfòmasyon sou kibò san sa yo ta sòti, ni kilès ki ta kòmande san sa yo jouskaske yo te rive ap sikile nan vil Nòdès la.
Atik sa se pwopriyete prive ©️ Gwoup Medya MAGHAITI 2023
