Nan yon lèt Ministè Lajistis ak Sekirite Piblik (MJSP) voye bay Komisè Ernest Muscadin ki pibliye ayè dimanch 17 desanm 2023 a, yo rive kritike divès zak komisè a konn fè nan Miragwàn ak lòt kote. Konsa, minis Emmelie Prophète ki siyen lèt sa raple Muscadin plas li okipe a pap janm ka fè l pi wo pase lalwa peyi a.
Nan lèt sa, nimewo 1 nan ministè lajistis la pa mete dlo nan bouch li pou repwoche Komisè gouvènman(CG) Miragwàn nan nan fason l ap aji yo. Se pou sa, yo estime gen nan aksyon li konn poze yo se bagay ki ilegal yo konn ye, e ki pa gen anyen pou wè ak jan l ta dwe travay pou benefis moun ki dwe jije yo.
“Pase pou w ta fè travay ou ki se aji nan benefis jistisyab yo, ou menm ou pito bay tèt ou lòt misyon e sanble ou menm tabli pwòp règ ak pwòp prensip ou. Ou menm pèmèt pou kèk endividi bloke sikilasyon sou non w sou baz pawòl san fondman, sa nou pap pran l ditou nan men yon moun lalwa alevwa pou yon komisè gouvènman“, daprè sa nòt la di.
Pi lwen, enstitisyon jidisyè a revele yo jwenn anpil plent kont Muscadin, sa ki fè y ap siveye ak anpil atansyon e ap pran tan yo pou verifye pandan y ap raple l tou nenpòt plas li okipe la paka fè l pi wo pase lalwa ki tabli nan peyi a.
Pou sa ki konsène ti bouch louvri ant chèf gouvènman Miragwàn nan ak chèf Okay la, Ronald Richemond pou kesyon yon chèf gang ki ta twouve l nan jiridiksyon Okay la, ministè lajistis te pwofite voye yon lèt repwòch tou pou CG Richemond kote yo voye yon mesaj klè pou 2 komisè yo. MJSP fè konprann se Miragwàn ki tout limit Muscadin, tandiske pou Richemond li menm yo raple l se pa sansasyon pou l ap fè, men se fè travay li byen epi kote ki fèt pou sa.
“MJSP sezi wè konpòtman w komisè, vye pawòl ou yo nan medya kont kolèg ou a nan Miragwàn nou dwe kondane yo menm jan ak zak li fè ki pa nan jiridiksyon l la. Nenpòt pwoblèm ki ta gen ant majistra pa dwe regle sou plas piblik“, selon lèt ministè ekri voye bay CG Okay la.
Boutofen, minis Emmelie Prophète konseye pou 2 komisè yo reprann chimen ki trase pou tout CG yo pandan yo pa dwe bliye tou prensip bon konpòtman tout responsab sèvis piblik yo dwe genyen. Yo mansyone nan tou 2 lèt yo se ap dènye rapèl ministè a ap fè yo konsènan move ajisman sa yo.
Atik sa se pwopriyete prive ©️ Gwoup Medya MAGHAITI 2023
