Aprè anpil tan li fè absan nan endistri mizikal ayisyen an, atis Baky Popilè deside tounen ak tout flanm dife l. Yè ki te madi 9 novanm nan, atis la ki se moun okay pibliye yon nouvo mizik ki rele “Mete limyè sou mwen” kote li deside boule kouwòn tout fo “King” nan rap kreyòl la, ak chante antèman tout fo rapè. Yon fason pou tout pwojektè ka brake sou li.
Gen plis pase 200 000 moun ki gentan gade videyo nouvo mizik Baky a, alòske li poko menm gen yon bon jounen depi l pibliye. Anpil moun sou entènèt la kalifye mizik sila a de mizik polemik, anpil lot di, jan granmoun yo konn abitye di l la, “Grenn Baky plen men l”.
Rezon an senp, atis la soti yon mizik kote li chache mete tout moun nan plas yo. Jan gran save yo te ka di l ” Chacun son métier, les vaches seront bien gardées “.
“Se lè w gade m w ap wè game sa pat cho vre, w ap wè tout rapè ou te konn ap di ki fò yo pa fò vre”, Baky di ansanm pawòl sa yo nan kòmansman mizik la.
Kèk atis ki panse yo se gran rapè, Baky di “yo tout se zonbi yo ye”. Ak tout lajwa nan kè l, li chwazi chante antèman yo. Nan kòmansman videyo a, nou wè atis la ki al vòlè yon kouwòn e li deside boule l, yon fason pou l montre pa genyen “King” nan rap kreyòl la.
Nan videyo sa ki dire anviwon 4 minit, Baky prezante tèt li sou plizyè fòm. Yon vòlè, yon militè, yon pè, yon “bad boy” men sitou, li prezante tèt li tankou yon moralis, yon gran save k ap bay tout atis ki nan HMI la leson. “Si w pa janm ka grandi antanke moun, kòman w ta vle pou mizik ou grandi”.
Anpil fanatik Baky bat gwo bravo pou mizik la. Yo pa kache lajwa yo pou videyo a tou, ki aprann yo anpil bagay.
Pou mete lwil sou dife a, anpil fanatik site non Wendy ak Roody Roodboy kòm atis ki pran gwo frap nan mizik sa.
Pandan anpil moun te panse karyè atis la pran fen, Baky di li chwazi vin mete fen nan karyè anpil atis. Jiskaprezan, “Mete limyè sou mwen” kontinye ap fè pale de li sou tout rezo yo. N ap raple ke atis la pwomèt 2 albòm pou fen ane 2021 an.
Marckenley Elie
© Tous droits réservés – Groupe Média MAGHAITI 2021
World
Discussion about this post