Nan yon nòt ki sòti jodi jedi 4 avril 2024 la, Ministè Edikasyon Nasyonal ak Fòmasyon Profesyonèl (MENFP) anonse yo fè gwo chanjman nan kalandriye eskolè 2023 ak 2024 la. Nan chanjman ki fèt yo, responsab yo fè konnen gen nouvo dat pou tout egzamen leta yo sòti nan 9yèm ane fondamantal rive nan egzamen nòmalyen yo.
«Ministè Edikasyon Nasyonal ak Fòmasyon Profesyonèl (MENFP) ap enfòme piblik la, sitou ajan edikatif yo, li deside reyamenaje kalandriye eskolè 2023-2024 la, kon sa a, dat egzamen leta yo chanje“, daprè sa yo fè konnen pandan yo soulinye desizyon sa a pran se aprè divès reyinyon ak planifikasyon yo te fè anfavè elèv ak etidyan yo.
Pou sa a ki konsène dat egzamen leta yo, elèv 9yèm ane fondamantal yo ap gen pou al konpoze sòti 22 pou rive 26 jiyè 2024 la. Pou elèv bakaloreya yo, y ap gen pou fè egzamen pa yo a sòti 5 pou rive 8 dawout 2024 la.
Nan sa k gen pou wè ak egzamen Lekòl Nòmal Enstititè yo ak pa Sant Edikasyon Familyal la, ministè a anonse yo menm y ap fèt nan dat 22 pou rive 26 jiyè 2024.
Li enpòtan pou n konnen, ministè a di gen 4 matyè ki ajoute anplis sa k te gen deja yo pou egzamen 9èm A.F. Edikasyon Sivik, Edikasyon Fizik ak Espòtif, Edikasyon Atistik ak Estetik, epi Edikasyon sou technoloji ak Aktivite Pwodiksyon se non nouvo matyè sa yo ministè a di y ap fè yon fason espesyal ki ta dwe fasil pou chak kandida yo.
Yon lòt kote, responsab yo nan ministè a raple tout direktè lekòl yo enskripsyon anliy pou pwofesè ak elèv ki pral konpoze yo ap fini 12 avril k ap vini la. Kon sa a, MENFP ankouraje direktè yo pou fè etap sa a sou sit ministè a puiske yo estime se yon kondisyon ki enpòtan anpil.
Paralèlman antite sa a ki responsab zafè levasyon nan peyi a pwomèt ane sa a ankò, y ap fè kou yo konnen pou akonpanye tout kandida ki nan lwès ak lòt zòn ki afekte ak vyolans gang yo. Se nan menm sans la tou, yo pwofite kondane tout atak bandi ap fè sou lekòl ak inivèsite yo e mande tout sektè yo pou pwoteje dwa edikasyon timoun yo ta dwe genyen nan peyi a.
«MENFP ap akonpanye tout elèv pou ede yo reyisi egzamen yo nan mete sou pye tout kalte pwogram edikatif sou radyo, sou televizyon, sou kle USB, sou sit ministè a ak kou konpansasyon aprantisaj ak prezans anseyan toupatou», pou yo fini ak kominike sa a.
© Tous droits réservés – Groupe Média MAGHAITI 2024
