Nan yon kominike ki pibliye jodi mèkredi 8 mas 2023 a, Medsen San Fwontyè (MSF) anonse yo fèmen lopital yo gen nan Site Solèy la pwovizwaman. Yo pran desizyon sila pa paske yo sible dirèkteman men yo estime yo pap ka pwoteje pèsonèl yo genyen yo ak tout malad yo.
Selon sa yo di, se ta afwontman gang yo depi 28 fevriye 2023 a, pa twò lwen lopital la nan Site Solèy ki fè yo rive pran dezisyon sa.
“Medsen San Fwontyè nan enkapasite l pou garanti sekirite pèsonèl li ak malad yo. Nou anonse nou fèmen pòt lopital nou an nan Site Solèy pou yon ti tan“, daprè sa yo eksplike nan kominike a.
Nan yon bò, responsab yo eksprime enkyetid yo fas ak sitiyasyon vyolans ak ensekirite sa k ap devlope nan prèske tout zòn nan kapital la. Sa ki lakòz kounya yo resevwa plis moun blese pa rapò ak jan sa te konn ye nan lopital MSF Tijo a.
“Ekip nou yo resevwa chak jou 10 fwa plis blese pa bal pou pi piti“.
Nan yon lòt bò, yo fè konprann yo konnnen konsekans fèmen lopital la se plis moun nan zòn nan k ap peye sa, men yo kontinye pou di yo pap ka kenbe yo pito fèmen pòt yo pou kounya.
“N ap viv sèn gè a tou pre nou, lopital nou an pa sible dirèkteman men nou viktim konba ki genyen an. Nou jwenn plizyè bal mawon anndan lopital la epi l prèske enposib pou malad yo ak sila yo ki menm blese nan gè a jwenn wout pou antre nan lopital la“, daprè temwanyaj Vincent Harris youn nan responsab òganis entènasyonal la.
Paralèlman, responsab yo fè konnen tout lòt lopital yo gen nan lòt zòn yo tankou MSF Taba, klinik yo nan dèlma 33, latibonit, Sant ijans yo nan zòn Tijo ap kontinye fonksyone.
N ap raple sòti 27 fevriye pou rive 4 mas 2023 a, prezime bandi touye 60 moun, epi 50 lòt disparèt, selon Pierre Espérance responsab Rezo Nasyonal Defans Dwa moun(RNDDH).
Atik sa se pwopriyete prive ©️ Gwoup Medya MAGHAITI 2023
Discussion about this post