Medsen rezidan Lopital Sanatoryòm tanmen premye jou grèv yo jounen jodi lendi 27 mas 2023 a, akoz move kondisyon travay y ap fè fas nan lopital la, aprè yo te fin sòti yon kominike depi dat 24 mas 2023.
Nan kominike a yo te denonse divès pwoblèm tankou entran ki pa genyen pou sèvi malad yo, laboratwa a ki pran 5 jou pou li bay yon egzamen ki pa menm konplè, yon machin ki pou fè egzamen krache ki gen 2 an depi li gate, men yo pa janm ranplase li, sak lakoz y ap jwenn yon egzamen sou yon mwa. Epi yon bonbòn oksijèn ap vann 1500 dola Ayisyen nan lopital la, depi li fè 2è tapan lopital la fèmen, se sèl medsen ak malad yo ki rete ladan l, elatriye.
«Nou menm medsen rezidan Sanatoryòm, fè anpil sakrifis ak anpil rezidans pou nou ofri yon ti moso lasante ak moun ki pi vilnerab nan sosyete a, malgre n ap travay nan yon sitiyasyon nou pa te janm imajine», selon sak te ekri nan kominike Lopital la.
Administratè lopital la ak enfimyè yo kontinye pa vin travay, anplis pwoblèm dlo ak kouran espas la ap konnen. Kidonk, yo di yo bouke ak move fonksyonman espas la, yo vle popilasyon an konnen nou pa kondisyone pou resevwa malad.
«Nou mande pou yo reponn ak òganizasyon ki responsab Pwogram Nasyonal Lit Kont Tibèkiloz la (PNLT) epi Inite Jesyon Pwojè (UGP), ki pa regle anyen pou malad yo nan koze manje ak lòt bagay ankò», se sa medsen rezidan César Roodlyne rapòte bay Mag Haïti.
Anplis nan kad premye jounen grèv la, gen anpil mesaj ki te afiche nan pankat yo avèk plizyè mesaj.
«Nou bezwen pou lopital la toujou pwòp, nou mande reparasyon sal konferans lan, nou bezwen yon anbilans Sanatoryòm...» selon kèk mesaj kòm revandikasyon medsen rezidan yo.
Selon medsen rezidan César Roodlyne «Direktè a okouran pwoblèm yo, chak nou pale avèk li, li pito di nou se li ki chèf ak administratè lopital la. Olye li reponn avèk revandikasyon nou yo.»
N ap raple Lopital Sanatoryòm se youn nan sant medikal nan Metwopolitenn Pòtoprens lan ki okipe patikilyèman ak sila yo ki gen pwoblèm Tibèkiloz ak lòt maladi nan poumon ankò.
Atik sa se pwopriyete prive ©️ Gwoup Medya MAGHAITI 2023
