Anviwon 2 mwa aprè, medsen rezidan lopital Inivèsite Leta(HUEH) yo pa deside kanpe nan grèv yo te tanmen nan lopital la depi mwa desanm pase a. Revandikasyon yo pa chanje, yo menase pou yo pa kontinye travay si leta pa reponn ak sa yo mande yo.
Medsen sila yo te reyalize plizyè mach nan pòtòprens pou fè revandikasyon yo pase, yon sitiyasyon ki pa t chanje ayè lendi 13 fevriye 2023 a, kote yo t ap kritike fason leta an plas la pa bay pyès enpòtans ak sistèm sante peyi a.
Se nan menm sans sa tou, yo te profite lonje dwèt sou direktè jeneral Ministè Sante Piblik ak Popilasyon an(MSPP), Lauré Adrien ki selon sa yo te ekri sou kèk pankat ta patisipe nan kraze lopital la pou Konstui lopital prive l.
“Toutotan tout sa n ap mande yo nou pa jwenn yo, nou pap retounen travay”, se deklarasyon youn nan medsen yo ki te nan mach la.
” Nou pap retounen nan yon lopital k ap fonksyone tankou yon bouchri. Jounen jodi an mwen pa kwè gen youn nan moun k ap dirije Ayiti yo la si yo ta menm gen yon tèt fè mal y ap aksepte vin lopital jeneral, se pa paske yo konnen pa gen konpetans lopital jeneral, rezon an senp se paske yo konnen yo met lopital la nan yon eta moun pa ta dwe ap resevwa swen ladan l“, toujou daprè sa yo t ap di.
Nan yon lòt bò, Kolektif Defansè Plis yo, nan yon nòt pou laprès kondane yo menm tou konpòtman gouvènman defakto a fas ak sitiyasyon lopital la k ap vinn pi mal chak jou. Nan sans sa, responsab estrikti sa a mande otorite yo pou tande kri divès medsen ak ti pèsonèl yo ap fè, sa ki selon yo menm ap pèmèt lopital la fonksyone byen.
Nan sa ki gen pou wè ak revandikasyon profesyonèl lasante yo, yo mande bon kondisyon travay kote y ap ka bay sèvis nan lapropte, bon jan materyèl, yon pi bon salè ki ta 55 000goud pou chak medsen rezidan ak yon lòt administrasyon nan tèt lopital la.
Photo: Le Facteur Haïti
Atik sa se pwopriyete prive ©️ Gwoup Medya MAGHAITI 2023
Discussion about this post