Nan yon entèvyou li bay France 24 ayè madi 20 jen an, ansyen premye dam nan Martine Moïse fè konnen aprè tout ankèt ki tanmen, li menm ak tout ekip li gen yon lide sou kiyès ki ta touye prezidan an. Poutan, malgre deklarasyon sila li pa rive site okenn non, men di li pito kite pou enstans konsène yo bay rezilta ankèt yo.
“2 lane aprè, nou plis gen yon lide sou kibò sa sòti men akòz gouvènman aktyèl la ki sanble enplike nan lanmò a ankèt la pa mache jan pou l ta mache a vre. Men malgre sa, nou plis wè klè sou moun ki kache dèyè zak sa“, daprè deklarasyon ansyen premye dam nan ki di tou, li prefere kite pou DCPJ ak lòt enstans ki t ap mennen ankèt yo pou bay idantite tout moun ki enplike nan touye 58yèm prezidan an olye se li ki bay yo.
Pandan tout entèvyou a, Martine fè konprann, menm si gen anpechman nan peyi Dayiti pou bon jan ankèt mennen epi pou n rive konnen tout bon kiyès ki kache dèyè zak sa,”verite a ap sòti kanmenm, e lè sa tout moun ap konnen kiyès ki fè sa”.
Nan sa ki gen pou wè ak lis moun ki te nan dwòg prezidan Jovenel Moïse te gen entansyon bay gouvènman ameriken an, madanm defen an fè konnen gen bagay tankou sa k gen rapò ak politik li pa t janm konn pale ak mari l, li di tou, li pa t konn lis la, men li swete pou l ta pibliye nan lide pou je tout moun ta wè non ki ladan l yo.
Yon lòt bò, sou sa ki gen pou wè ak solisyon pou kriz peyi a ap konnen la, li bay 3 pwen enpòtan pou n diskite epi pou n fè. “Gade Pwoblèm sekirite a, fè referandòm, epi òganize eleksyon“, daprè sa l di pandan l fè konprann tou, se ak yon lòt premye minis ki ap nan yon gouvènman konsansyèl pou sa yo rive fèt.
Pou kounya, Martine Moïse di sèl espwa l se sou tribinal penal entènasyonal la li mete l, paske l kwè se yo ki ka bay yon repons nou ka fè konfyans nan kad dosye lanmò ansyen prezidan Jovenel Moïse.
Atik sa se pwopriyete prive ©️ Gwoup Medya MAGHAITI 2023
