Nan yon konferans pou laprès jounen Jodi Madi 6 Septanm 2022 a, nan lokal pati politik Ayiti An Aksyon (AAA), manm Pwotokòl Antant Nasyonal la (PEN), bat bravo pou tout moun nan divès depatman nan peyi a ki leve kanpe kont premye minis defakto Ariel Henry.
Pou ansyen minis kondisyon fanm lan, Marie Dénis Claude, leve kanpe sa yo vle di jounen jodi a tout òganizasyon yo konprann nesesite pou yo enplike yo nan mouvman leve kanpe a nan tout depatman yo. Li te tou pwofite denonse lavi chè, gang epi kalifye dirijan yo, tankou yon bann san konsyans.
Bò kote ansyen depite Antoine Rodon Bien-aimé, bilan pouvwa anplas la gen plis fòs kote nan konte kadav, ensekirite, grangou, chomaj, kòripsyon epi kidnapin. Toujou pou depite a, sanble premye minis lan genyen yon move lespri nan tèt li k ap mache kraze fanmi nan peyi a. Manm PEN lan felisite ak ankouraje tout moun pou rete kanpe rèd pasifikman jiskaske Ariel Henry bay tèt peyi a.
Dirijan Fòs Nasyonal pou Demokrasi a Serge Jean-Louis, kote pa li te deklare echèk pouvwa Ariel Henry a epi di PEN pa chanje pozisyon pou zafè yon pouvwa 2 tèt la. Li te tou pwofite envite chak grenn moun ki potko foule beton an pou yo fè sa, paske pèsonn etranje p ap vin pote chanjeman pou yo.
Kwòdonatè pati politik Ayiti An Aksyon Youri Latortue, fè konnen pouvwa anplas la pa gen pyès volonte politik pou rezoud ensekirite a ak kesyon pwodiksyon nasyonal la epi eleksyon yo ki pa rive fèt jiskaprezan. Ansyen senatè a te tou pwofite kritike bank santral ki ranvwaye aplikasyon sikilè 114-3 lan. Manm PEN yo ak manm Ayiti An Aksyon yo te tou anonse prezans yo sou beton an nan manifestasyon ki prevwa fèt 7 septanm k ap vini la pou kontinye mande demisyon chèf gouvènman an nan tèt peyi a.
Atik sa se pwopriyete prive ©️ Gwoup Medya MAGHAITI 2022
Discussion about this post