Konsèy prezidansyèl la ap gen pou nome 9 minis. Se yon desizyon ki pran jounen vandredi 7 jen 2024 la, nan yon vòt ki rive fèt ant konseye prezidansyèl yo.
Se sosyete sivil lan k ap gen ministè Afè sosyal ak travay, alòske Pitit Desalin ap genyen ministè Agrikilti, resous natirèl ak devlopman riral ak ministè Anviwonnman.
Toujou aprè vòt sa, ministè sante piblik rete nan men akò 21 desanm nan ki gen ladan l doktè Gérald Gilles, youn nan konseye prezidansyèl yo. Pou ministè Edikasyon nasyonal ansanm ak ministè Kominikasyon se akò Montana a k ap dirije yo. Fanmi Lavalas li menm gen sou direksyon l ministè Travo piblik epi akò 30 janvye a genyen ministè Touris.
Apre vòt sa ki te repati ministè nou te site pi wo yo ak diferan pati politik yo, rete sèlman ministè Kondisyon fanm, ministè Defans ak ministè Jenès.
EDE/RED se pati politik sa yo ki poko fè chwa ministè yo ta renmen genyen an, e poutan, REN li menm pa t deside vote ditou.
N ap soulinye pou, gouvènman an poko monte, divès oganizasyon politik kòmanse anonse mobilizasyon, èske sa ta vle di ya p fè PM nome a santi yo la, oubyen yo ta estime yo poko wè klè nan separasyon divès ministè k ap fèt jounen jodia.
Atik sa se pwopriyete prive ©️ Gwoup Medya MAGHAITI 2024
