Nan yon nòt ki pibliye nan jounal Listin Diaro jounen jodi dimanch 16 avril 2023 a, prezidan Repiblik Dominiken an Luis Abinader pase enstriksyon pou entèdi anpil pami sila yo peyi Kanada ak Etazini sanksyone pou yo pa pile teritwa Nasyonal la. Selon prezidan an yo reprezante yon menas pou enterè ak enstitisyon peyi a.
«Atik 128-1 nan konstitisyon Dominiken an bay prezidan Repiblik la, nan kapasite li kòm chèf leta pou entèdi lè sa bon pou enterè piblik la, antre etranje sou teritwa Nasyonal la», selon sa ki ekri nan nòt prezidansyèl Luis Abinader a.
Gouvènman Kanada ak Etazini pa sispann sanksyone plizyè aktè nan domèn politik ak ekonomik, kòm moun ki itilize trafik enfliyans yo, nan relasyon avèk chèf gang pou kreye ensekirite nan peyi Dayiti, anplis patisipasyon nan zak koripsyon pandan manda yo, elatriye.
«Poutèt sa lwa nimewo 285-04, jeneral migrasyon ak règleman aplikasyon li yo ki nan dekrè nimewo 631-11, penmèt yo anpeche antre nan teritwa Nasyonal la etranje sa yo ki genyen dosye kriminèl oswa ki nan opinyon otorite yo konpetan, ki reprezante yon kalite menas kont sekirite Nasyonal la ak enterè yo nan Repiblik la», sa ki kontinye ekri nan nòt prezidansyèl la.
Nan 28yèm somè Ibewo-Ameriken ki te òganize nan peyi Repiblik Dominiken nan dat 25 mas ki sot pase la, Luis Abinader te fè konnen kominote entènasyonal la paka ki te kriz la ap pran plis tan an Ayiti, paske majorite moun k ap fè fas avèk kriz sa se sila yo ki pòv yo. Poutan, kèk moun ki rich ta ap viv Miyami ak Sendomeng.
«Daprè sa ki endike anwo a epi sou rekòmandasyon òganizasyon defans ak sekirite korespondan yo mwen menm Luis Abinader, prezidan konstitisyonèl Repiblik Dominikèn, daprè pouvwa nimeral I, literal b, atik 128 Konstitisyon an ban mwen, mwen bay enstriksyon sa yo» toujou selon sa ki ekri nan nòt prezidansyèl la.
Paralèlman, li tou pwofite mete yon lis non moun pou imigrasyon Repiblik Dominiken dwe anpeche antre nan teritwa nasyonal li a, tankou : Ansyen senatè Youri Latortue, Ansyen senatè Garcia Delva, Ansyen minis enteryè ak kolektivite teritoryal Liszt Quitel, Rodolphe Jaar ki akize nan asasina prezidan Jovenel Moïse, Bredy Charlot, Kesner Normil, Ansyen premye minis Evans Paul, Jounalis Assad Volcy, ansyen depite Jean Tholbert Alexis, ansyen depite Victor Prophane, ansyen premye minis Laurent Salvador Lamothe, ansyen senatè Richard Lenine Hervé Fourcand, elatriye.
Se moun Kanada ak Etazini te gentan sanksyone deja anplis sila lajistis Ayisyen ap chèche ak pini pou zak kidnapin, asasina, Asosyasyon malfektè epi koripsyon, kote prezidan Dominiken an pase lòd ak imigrasyon pou pa kite moun sa yo pile pwent pye yo sou sòl lakay yo.
Atik sa se pwopriyete prive ©️ Gwoup Medya MAGHAITI 2023
