Nan yon mesaj pou nasyon li, prezidan dominiken an Luis Abinader deklare ayè dimanch 17 septanm 2023 a, tout fwontyè ayisyano-dominiken yo ap rete fèmen jouskaske ayisyen ta deside kanpe konstriksyon kannal la nan vil Wanament, selon Listín Diario.
Malgre tout defisi ak enkyetid komèsan ak prodiktè dominiken yo sibi semèn pase a akòz fwontyè yo ki fèmen, chèf Leta yo a fè konnen tout mezi li te pran yo ap toujou kenbe.
“Abinader kenbe menm mezi yo sou bay ayisyen viza, entèdi moun ki dèyè konstriksyon kannal la pou antre Repiblik Dominikenn, fwontyè terès, maritim, anlè yo k ap rete fèmen jouskaske tout travay konstriksyon kannal la kanpe“, selon sa jounal la presize.
Pandantan sa, prezidan dominiken an te eseye jistifye mezi sa yo kote l fè konprann se pa konfwontasyon peyi l la ap chache genyen ak Ayiti, men se pito yon mwayen y ap chache pou etabli lapè pou pèp dominiken an.
“Se pa yon konfli nan mitan 2 pèp paske ni pèp dominiken an ni pèp ayisyen an pa vle konfwontasyon, pèp nou an li menm montre li vle lapè. Nou pa vle, ni nou pap chache konfwontasyon men n ap fè fas kare ak kèk moun san kontwòl ki responsab sitiyasyon ensekirite a an Ayiti, ki jounen jodi a akòz enterè pa yo ap konplote kont gouvènman ayisyen an epi atake sekirite resous dlo nou yo“, se sa chèf gouvènman dominiken an fè konnen nan diskou sa li te fè ayè dimanch de la.
Yon lòt kote, li fè konnen yo gen tout dwa yo pou pran mezi sa yo paske yo estime peyi Dayiti manke planifye konstriksyon sa yo bezwen fè a. Se yon konpòtman ki daprè sa l di te detui deja pwòp ekosistèm ayisyen an ak move fason yo jere resous natirèl yo genyen yo. Selon li menm, sa ka domaje ekosistèm youn nan zòn imid ki pi enpòtan nan Sendomeng ki se lak dlo dous Laguna Saladilla.
Atik sa se pwopriyete prive ©️ Gwoup Medya MAGHAITI 2023
