Akòz divès atak bandi ak zam fè nan zòn Kafoufèy pandan tout jou yo, aktivite nan lopital Sanatoryòm yo paralize. Nan sans sa, direktè medikal lopital la, Jean Ardouin Louis, atire atansyon tout moun sou divès konsekans sa ka genyen si tout fwa bandi yo ta rive atake enstitisyon an.
Nan kad yon entèvansyon responsab la fè sou panèl Magik9 jodi mèkredi 30 dawout 2023 a, li fè konnen vyolans nan Kafoufèy la afekte lopital la, e li soulinye tou gen moun ki depann sou tretman lopital la bay yo.
“Pou kounya la lopital la pap byen fonksyone paske moun yo ap kouri pou twòp tire gen anpil moun ki rete nan anviwon lopital la, gen moun ki pèdi kay yo kounya yo se sinistre nan espas la, gen rezidan se nan lopital la yo dòmi. Akòz sitiyasyon Kafoufèy la, malad yo pa vle vini, gen malad ki depann de lopital Sanatoryòm paske si yon moun gen dlo nan poumon l se lopital la ki ka retire l pou yo”, daprè deklarasyon medsen an.
Nan menm kad sa, responsab la soulinye gen malad ki pa janm vinn pran medikaman ki bon pou yo, alòske li di li enpòtan pou pasyen an pran medikaman yo chak jou pandan 6 mwa pou evite rive nan faz kote kò a abitye ak medikaman an, e li fè konnen tou nan ka sa pasyan an ka kontamine lòt moun si trètman an pa fèt byen. Yon lòt kote, li fè konnen se gras ak entèvansyon lapolis ki fè jounen jodi a bandi yo poko rive sou yo.
Pi lwen, Jean Ardouin Louis swete pou sitiyasyon an ta retounen nan nòmal li paske konsekans yo ap twòp si li ta rive fèmen. Konsa li envite nèg ak zam yo pou ta kite lopital la fonksyone pou l kontinye bay pasyan yo sèvis.
Atik sa se pwopriyete prive ©️ Gwoup Medya MAGHAITI 2023