Premye minis defakto Ariel Henry inogire lekòl Nasyonal «Jean-Baptiste Boukman» jounen ayè mèkredi 17 me 2023 a nan Lakil Dinò. Yon lekòl ki konstrui avèk finansman gouvènman Ayisyen an atravè Fon Nasyonal Edikasyon (FNE), lekòl sa a koute Leta anviwon 49 milyon goud.
Direktè lekòl sa a di : «Li vrèman kontan pou konstriksyon lekòl sa a parapò avèk demann popilasyon an. Lekòl sa a ki pral penmèt yon pi bon distribisyon edikasyon nan kominote sa a», selon deklarasyon Frankel Maurisset aprè yo te fin remèt li kle a.
Alòske Jean Ronald Joseph ki se Direktè Fon Nasyonal Edikasyon an (FNE) ta pral ajoute pou l di : «Konstriksyon batiman sa a koute leta anviwon 49 milyon goud. Li fèt sou yon espas 2500 kilomèt kare, li ka resevwa 400 timoun an total.»
Sou lòtbò, Minis Edikasyon Nasyonal ak Fòmasyon Pwofesyonèl la (MENFP), Nesmy Manigat, te vrèman kontan pou travay ministè a. Li raple n gouvènman an ap kontinye pran revandikasyon ansèyman yo an chaj.
Pou okazyon sa a, premye minis Ariel Henry te atire atansyon nou sou jefò gouvènman an ap fè pou konstrui plis lekòl nan peyi a. «Se yon gwo bagay lè yon zòn an pwovens konn enpòtans edikasyon. Gouvènman an ap kontinye pou travay nan lide pou li satisfè bezwen zòn sa yo. Mwen konte sou moun Akilwa yo pou byen jere batiman sa a. Tout peyi a dwe kapab gen lekòl modenn pou timoun yo», selon sa a premye Minis Ariel Henry te fè konnen nan moman inogirasyon an.
N ap raple plizyè manm nan gouvènman an te prezan nan inogirasyon lekòl Nasyonal «Jean-Baptiste Boukman», tankou minis Kominikasyon ak Lakilti an, Emmelie Prophète Milcé, minis kondisyon fanm nan, Dr. Sofia Enold Joseph, minis Edikasyon Nasyonal ak Fòmasyon Pwofesyonèl la, Nesmy Manigat, epi premye minis Ariel Henry.
Credit Photo: Press Lakay
Atik sa se pwopriyete prive ©️ Gwoup Medya MAGHAITI 2023
