Nan lannuit 17 pou rive 18 me 2023, 2 chablennde rive boule pou Lapolis ak yon polisye disparèt nan zòn Sous Matla, selon konfimasyon responsab Sendika Polis Nasyonal Dayiti a (SYNAPOHA), Lionel Lazare.
«Efektivman genyen 2 chablennde ki boule nan zòn sous Matla. Se ta bandi Ti tanyen yo ki fè zak sa. Anplis, ta sanble genyen yon polisye ki disparèt nan kad atak sila», pou ajoute sendikalis SYNAPOHA.
Pandan premye minis defakto Ariel Henry deplase avèk plizyè polisye nan depatman Nò pou ale selebre fèt drapo nan dezyèm vil peyi an, nèg ak zam tou pwofite mete dife sou 2 chablennde nan peyi an pou yon lòt fwa ankò.
«Nan moman an m poko ka bay bilan egzakteman sou kantite polisye ki viktim ni ka di ki kote lapolis t ap sòti oubyen kisa yo te sot regle ki lakoz 2 chablennde sila yo boule», toujou nan kad eksplikasyon sendikalis Polis Nasyonal Dayiti (SYNAPOHA) t ap bay Mag Haïti.
N ap raple se pral 3èm chablennde ki boule anndan peyi an nan entèval 1 an, puiske te gentan gen youn ki boule nan dat 12 novanm 2022, anba bandi Kanaran nan wout Nasyonal # 1 an.
Atik sa se pwopriyete prive ©️ Gwoup Medya MAGHAITI 2023
