Lapolis Nasyonal Dayiti rive fè kwazman avèk kèk endividi ak zam ki ta pral eseye pote ranfò nan batay k ap fèt sou Bèlè ak Solino jounen jodi jedi 23 mas 2023 a, kote anpil kout zam ta pral demare epi youn ladan yo ta pral tonbe anba bal nan kad echanj kout zam sa, selon sa yon sous rapòte ak redaktè Mag Haïti.
Lapolis Nasyonal Dayiti espesyalman Inite Depatmantal Mete lòd (UDMO) ta pral touye youn pami prezime bandi yo ki te nan 2 machin zo reken «Toyota Land cruiser.» Polisye yo rive sezi 2 zam.
Plizyè pami lòt prezime bandi yo sòti blese nan kad echanj kout zam ki te genyen ant ajan UDMO yo avèk yo menm. Poutan, se yon sèl ki mouri nan moman entèvansyon Lapolis la.
Nan tout rakwen nan zòn Lali, Pòs machan, Chanmas, elatriye kout bal t ap chante kote moun ki t ap regle aktivite yo, chofè moto epi chofè machin t ap prese vit kouri rantre lakay yo ak fèmen biznis yo akoz yon kidnapin ki t ap eseye fèt bò Natcom lan tou.
Sou lòtbò, popilasyon nan lokalite Dyèg, komin Petyonvil pa sispann kouri kite kay yo pou bandi k ap teworize yo depi nan kòmansman semèn lan.
Atik sa se pwopriyete prive ©️ Gwoup Medya MAGHAITI 2023
