Kèk jou aprè lajistis te finn envite l pou al reponn kesyon nan pakè Pòtoprens, lapolis rive arete jodi jedi 23 novanm 2023 a, ansyen direktris jeneral adjwen ONA a, Stéphanie Mondestin nan ayewopò Entènasyonal Toussaint Louverture a. Selon detay ki bay yo, ansyen fonksyonè Leta a te sou wout pou kite peyi a pou al Repiblik Dominikèn.
Selon Radio Télé Métronome, destinasyon final Stéphanie Mondestin se te vwayaje pou al nan youn nan peyi ewopeyen yo. Poutan, se yon desizyon ki sispèk puiske avan sa pakè Pòtoprens te deja envite l pou vinn reponn sou divès akizasyon rapò Inite lit Kont Koripsyon (ULCC) te fè sòti sou li mèkredi 15 novanm pase a.
“Aksyon piblik dwe mete an mouvman kont Stéphanie Mondestin pou enterè ilegal li pran nan dosye sa (kay ONA te achete pou 86 383 053.93 goud) blanchiman pwodui krim nan epi pou asosiyasyon malfektè, yon bann bagay atik 5.3, 5.13 lalwa 12 mas 2014 la kondane menm jan atik 224, 225 kòd penal la kondane yo tou”, daprè sa anketè yo te mande kont ansyen fonksyonè leta a.
Pou kounya, enfòmasyon yo fè konnen otorite polisyè yo ap kenbe Stéphanie Mondestin jouskaske l al douvan lajistis 27 novanm k ap vini la.
Atik sa se pwopriyete prive ©️ Gwoup Medya MAGHAITI 2023
