Nan kad ankèt Inite lit Kont Koripsyon (ULCC) t ap mennen sou Asosiyasyon Nasyonal moun ki gen bòlèt yo (ANTB) ak Lotri Leta Ayisyen(LEH), yo fè konnen sou 5 lane kontra ki te siyen ant 2 enstitisyon sa yo, ANTB rive dwe Lotri Leta Ayisyen 4 211 280.00 goud. Mete sou sa, yo fè konnen tou depi lè kontra a fini nan lane 2018 la, 2 pati yo pa janm rive antann yo swa pou yo renouvle oubyen koupe kontra ki te gen ant yo a, yon aksyon ki selon ULCC lakòz gwo defisi bò kote leta ayisyen.
Selon ULCC, gen yon kontra ki te siyen ant ANTB ak LEH depi nan lane 2013, li te dwe bout aprè 5 lane (2018), men aprèsa sa li te ka posib pou l renouvle si toulède pati yo te rive mete yo dakò sou sa. Nan kontra sa, Asosiyasyon Nasyonal moun ki gen bòlèt yo(ANTB) te dakò pou bay LEH 20 goud sou chak kanè fich bòlèt ki vann 50 goud, e te dwe bay 5 mil goud sou chak pèmi oubyen otorizasyon l bay sa ki koute yo 10 mil goud. Tandiske pou DGI li te dwe bay 15 goud sou chak kanè ki vann.
“Asosiyasyon Nasyonal moun ki gen bòlèt yo te dwe bay Lotri Leta Ayisyen 22 211 280.00 goud, lajan sa reprezante pati pa LEH la, li sòti nan kantite kanè ki vann ak otorizasyon ki bay. Men, selon detay nou genyen sou lajan ki bay deja yo pandan peryòd 2013-2018 yo, nou jwenn se 18 milyon goud yo te rive bay sèlman. Sa ki fè ANTB dwe Lotri Leta Ayisyen 4 211 280.00 goud”, daprè sa rapò a fè konprann.
Nan menm sans sa, anketè yo presize kesyon ratman lajan ANTB te sipoze bay Lotri Leta Ayisyen an kòmanse, se sitou lè ansyen direktris LEH la, Marie Margareth Fortuné Daudier te vinn pran tèt enstitisyon an sòti mwa mai 2016 rive avril 2021.
“Pandan peryòd sa ANTB te sèlman bay LEH 3 milyon goud. Analiz nou fè sou divès dokiman bankè yo pèmèt nou konstate se sèlman 2 chèk yo te bay sòti me 2016 rive avril 2021. Chèk sa yo te bay konsa, youn se te yon chèk 2 milyon goud nan Sogebank ki gen nimewo #1173, lòt la te yon milyon goud nan BNC sou nimewo #1337 yo te bay li 4 jen 2018“, toujou daprè presizyon rapò a.
Yon lòt kote pou sa ki konsène lajan pa Direksyon Jeneral Enpo (DGI), yo soulinye kontribisyon 2 pati sa yo, kòmanse fèt 29 me 2018 li bout 5 fevriye 2021, sa ki te pèmèt DGI antre 9 641 075.00 goud. Malgre sa, ULCC fè konnen responsab Asosiyasyon Nasyonal moun ki gen bòlèt yo pa rive respekte kontra yo te siyen an vre, puiske nan menm kontra sa, li te obligatwa pou taks yo te kòmanse peye depi 2013.
Men, ULCC di lajan sa, responsab yo menm se jous nan 2018 yo al peye, sa ki fè lajan sa yo te bay la vinn pase pou ane avan yo(sòti 2013 rive 2017). Konsa, yo toujou dwe DGI lajan rès ane kontra a.
Selon estimasyon anketè yo, kontra sa ki mete diskisyon ant 2 pati yo e ki pa janm renouvle ankò a, vinn pa bon ditou pou ni Lotri ayisyen an ni pou DGI, e yo presize malgre kontra a bout Asosiyasyon an gen plizyè dèt pou l bay. Pandantan sa, yo fè konnen Asosiyasyon an nan bò pa l vinn lib kounya nan fè lajan poukont li puiske kontra a fini kidonk li pa gen okenn obligasyon pou peye ni LEH ni DGI.
Nan ka sa, ULCC mande pou Kou Dèkont (CSCCA) jwenn mwayen pou gade kòman responsab yo te jere Lotri Leta Ayisyen an, yo mande tou pou gen demach ki fèt pou se pa yon asosiyasyon prive k ap jere bòlèt ak jwèt aza nan peyi a, yo plede pou gen yon bon resansman ki fèt pou konn konbyen bank bòlèt ki genyen sou teritwa a e konbyen moun k ap dirije yo tou. Yon lòt kote, yo mande pou gen demach jidisyè ki fèt pou asosiyasyon Nasyonal moun ki gen bòlèt yo bay tout lajan li dwe Lotri Leta Ayisyen ak DGI.
Atik sa se pwopriyete prive ©️ Gwoup Medya MAGHAITI 2023
