Lapolis arete ayè dimanch premye janvye 2023 a 5 sitwayen nan petyon vil pou enplikasyon prezime yo nan asosiyasyon gang. Pami yo gen Kimberly Desrosiers yo konnen sou non “kkimyogaoffi” sou rezo sosyo yo, ki ta sanble li menm tou fè pati gang “257” ki ap opere nan zòn mòn Laza, daprè sa lapolis fè konnen.
Wildano Lestere, Estiver Alix, Romeus Thierry Max Dany, Emmanuel Tilen, ak Desrosiers Kimberly, youn nan figi ki popilè sou rezo sosyo yo , se tout non 5 moun sa yo lapolis mete men sou yo nan operasyon yo mennen ayè dimanch premye janvye 2023 a, deske yo ta sanble fè pati gang “257”.
Selon plizyè enfòmasyon, Alix Estiver alyas Petit Chef se ta youn nan chèf gang 257 lapolis rive pran. Plizyè lòt enfòmasyon fè kwè gang sa a ta gen lyen avèk pati politik PHTK. Se menm Alix sa ki soti yon mizik nan fen ane 2022 a ak atis Bourik de Latalay. Nan menm videyo mizik sa ki disponib sou Youtube depi 3 semèn, tout moun ka remake Kimberly Desrosiers ki kenbe yon gwo zam manch long nan men li.
Pandantan sa, nouvèl arestasyon sila yo patikilyeman arestasyon enfliyansez Kimberly Desrosiers ak Alix Estiver ki konn chante, deja fè anpil bri sou rezo yo. Nan sa ki gen pou wè ak popilarite, “kkimyogaoffi” se anviwon 21,1k moun k ap swiv Kimberly sou enstagram, li gen plizyè chapo nan sektè sosyal la, li se dansez, mannken, li se youn nan reprezantan “Paryaj pam”, li se yon yogi(moun ki pratike yoga) pou n site sa yo sèlman.
Pou kounya a, lapolis poko bay okenn lòt suivi nan kad dosye sa a, men anpil moun chita sou chèz ba yo pou tann kisa k ap di sou arestasyon enfliyansez la, ki gen pou fete 3 janvye k ap vini la.
Atik sa se pwopriyete prive ©️ Gwoup Medya MAGHAITI 2023
World
Discussion about this post