Nan kad yon ankèt responsab lapolis yo mennen sou kidnapin yon tifi 11 lane, yo fè konnen ayè madi 5 septanm 2023 a, yo te rive mete men sou 2 prezime otè zak sila nan mwa dawout ki sot pase a. Daprè temwanyaj youn nan akize yo, timoun nan se ta ti fanmi l, men li te deside planifye kidnapin nan nan lide pou l te fè lajan.
Erol Pierre ak Jean Velome Pierre, se non sitwayen sa yo ki enplike nan kidnapin tifi 11 lane sila, ki te jwenn arestasyon yo youn aprè lòt nan dat 6 ak 13 dawout 2023 a. Daprè kowòdinasyon près lapolis la prensipal otè zak la se Jean Velome Pierre ki li menm t ap viv nan menm kay ak viktim nan nan vil Jeremi, men ki pi douvan ta pral pran timoun nan antre ak li nan Pòtoprens pou t al sere l lakay Erol Pierre, ki se zanmi l, nan komin Petyonvil.
Nan odisyon 2 endividi yo douvan lapolis, yo fè konnen yo te pran 40 mil dola nan men fanmi timoun nan, yon kòb yo te rive pataje ant yo menm.
Yon lòt kote, Jean Velome Pierre ki se kouzen timoun nan akize zanmi an ki selon sa l deklare te ba l pwodui chimik pou te touye timoun nan, men li di li pa t dakò pou sa fèt.
“Li te ban mwen yon remèd, Erol te di m se fòmòl pou m te touye timoun nan, timoun nan se fanmi m li ye mwen menm m pa t gen sa nan tèt mwen, m pa t ap janm fè sa se kòb la ki te entèrese m”, se deklarasyon li fè kont zanmi an pandan akize a demanti pawòl li yo.
Pou kounya, responsab yo pa bay okenn enfòmasyon sou timoun nan. Men bò kote pa yo, yo fè kwè y ap toujou kreye yon fason pou goumen kont zak kidnapin nan peyi a.
Atik sa se pwopriyete prive ©️ Gwoup Medya MAGHAITI 2023
