Lapolis mete anba kòd 2 anplwaye nan Sogebank ki se Catherine Barochin ak Saint Paul Daphkar jounen jodi vandredi 5 me 2023, pou koze vòl ak konplisite vòl, asosyasyon malfektè epi lajan ki detounen selon enfòmasyon ki pataje sou paj Fesbouk Lapolis Nasyonal Dayiti (PNH).
Yon antite nan Direksyon Santral Polis Jidisyè, ki se Biwo Afè Finans ak Ekonomik (BAFE) te rive arete direktris operasyon ak Sipèvizè Kès la, pou kèk zak tankou asosyasyon malfektè, vòl, elatriye.
«Yo arete nan kad yon ankèt DCPJ te mennen aprè plizyè plent kliyan yo te depoze kont lajan yo k ap detounen nan bank sila ki evalye avèk 132 mil dola Ameriken», toujou selon sa ki ekri nan nòt Lapolis Nasyonal Dayiti.
Sou lòtbò a popilasyon an pa sispann goumen nan bank yo pou jwenn moso dola Ameriken, alòske Asosyasyon Pwofesyonèl Bank fè konnen gen ratman dola. Pa gen kantite dola Ameriken ki disponib pou tout kliyan.
«N ap note BAFE, antite nan Direksyon Santral Polis Jidisyè ap kontinye mennen ankèt nan kad dosye sila nan objektif pou yo ka jwenn plis konplis, sitou sila yo ki gentan lage pye yo», pou fini nan nòt sila Lapolis mete deyò a.
Atik sa se pwopriyete prive ©️ Gwoup Medya MAGHAITI 2023
