Lapolis Ameriken arete Johanna Napoléon, ki se sè biznisman Jhonson Napoléon pami 25 moun ki konn abitye vann fo diplòm nan eta Florid la. Daprè chif ajan federal yo bay, se anviwon 7 600 etidyan ki peye, an total 114 milyon dola vèt, sòti nan lane 2016 pou rive nan lane 2021 an pou koze fo papye, selon jounal Miami Herald.
«Yon rezo lekòl enfimyè k ap eksplwate ki chita kò yo nan sid Florid te takse ilegalman chak etidyan ant 10 000 dola vèt pou yon diplòm oksilyè enfimyè otorize epi 17 000 dola vèt pou diplòm enfimyè otorize san yo pa bezwen pran fòmasyon pou sa», selon sa otorite federal yo di sou dosye a.
Daprè achiv jidisyè yo jounal Ameriken an rapòte, lekòl enfimyè Johanna Napoléon ap dirije a, ki se “Palm Beach School of Nursing” ki nan zòn Lake Worth, fè pati 4 lòt lekòl enfimyè ki nan vann fo diplòm epi bay fo nòt. Toujou nan menm dosye sa, lapolis fè konnen gen 2 sitwayen(Geralda Adrien ak Woosvelt Predestin) ki te kondane pou 2 lane prizon pandan ane ki sot pase a nan yon operasyon yo te tanmen ki pote non” operation Nightingale“.
Nan operasyon sila, ajan federal yo eksplike, nan lane 2021 an, lekòl Johanna Napoléon se prezidan l lan, te vann yon ajan enfiltre(Federal Bureau of Investigation) FBI yon diplòm pou 16 000 dola ameriken nan espas 13 jou sèlman. Alòske, otorite lasante yo te deja pa rekonèt lekòl sila a depi me 2017, akòz yo pa te konn bay bon jan pousantaj reyisit nan egzamen sètifikasyon leta.
Daprè demach nòmal la, pwogram swen enfimyè ta dwe dire 2 lane nan lekòl prive sa men nòmalman se 4 lane li ye nan gwo inivèsite yo, kote w dwe gen yon travay teknik, pase egzamen nasyonal epi egzamen sètifikasyon. Men mèt lekòl sa yo, te pèmèt 7 600 etidyan achete diplòm nan peryòd 2016 pou rive 2021, pandan se sèlman 2 400 nan yo ki te rive pase egzamen pou jwenn lisans yo.
«majorite ladan yo se Ayisyano-ameriken», daprè presizyon otorite polisyè yo pote, kote yo di tou, moun prèske tout kote konn fè afè ak responsab lekòl sa yo.
Bò kote prokirè Markenzy Lapointe ki te pale sou sijè a, li fè konprann lè y ap pale sou moun ki gen fòmasyon, ki konpetan nan domenn lan li pap pale pou sa ki pase wout kochi, paske enfimyè yo gen anpil enpòtans pou yo.
“Profesyonèl sante nou yo jwe yon wòl enpòtan nan sistèm sante piblik nou an, se pou sa nou vle pou yo sa yo pretann yo ye a tout bon vre“, se deklarasyon li fè nan yon konferans pou laprès ayè mèkredi 25 janvye 2023 a, toujou nan zafè 25 machan ki sispèk nan vann fo diplòm nan Eta Florid la.
Pou kounya, Johanna Napoléon plede koupab douvan lajistis, li la sèlman pou l tann santans li.
Atik sa se pwopriyete prive ©️ Gwoup Medya MAGHAITI 2023
Discussion about this post