Jou ki te madi 15 fevriye a Mario Chandèl, ansyen chantè gwoup Chandèl la, mouri nan yon lopital Ozetazini. Lanmò sa rive nan yon moman kote sektè vodou a pèdi plizyè zotobre ki te konn pouse mizik rasin la byen wo. 2 zanmi defen an, nan yon ti pale ak Mag Haïti fè konnen Mario ap toujou vivan atravè zèv li.
Dantès Aisha, chantèz gwoup Aisha rasin mizik, ap pale nou de zanmi li.
“Mwen menm patikilyèman, sa ki te make m nan lavi Mario, pami tout sanba sektè a te rive pwodui pandan 2 ak twa dizèn lanne ki sot pase la yo, se rigè, konviksyon, seryezite li te genyen nan pozisyon li antanke sanba. Se youn nan bagay sektè a plis manke.”
Soti lanne 90 pou antre nan 2000 yo, Samba Mario te konnen yon gwo siksè ak gwoup Chandèl. Sa te vin rann li popilè. Aisha ap esplike nou kòman lanmò Mario kapab afekte sektè vodou a: “Mario Chandèl ap manke milye a anpil, paske se te yon sanba konsekan, kite gen konviksyon, ki pa janm chante pou ni flate yon gwoup moun, ni pou fè yon gwoup moun plezi, men pito, li te toujou denonse move kondisyon lavi majorite moun nan peyi a ap viv, epi tou li te toujou denonse moun kap fabrike mizè mas pèp la san se pa atansyon yo lap chache”.
Nan kad entèvyou sa, Dantès Aisha pat kache jwa li lè nou te mande l pou li pale nou de Mario. Li esplike nou li pa konsidere ansyen chantè Chandèl la tankou yon moun ki mouri. Li retekwè Mario ap viv atravè zèv li menm jan ak Azor ki te kite tè sa an 2011 epi Kessy nan lanne 2016.
“Se yon gwo atis, li ap toujou rete vivan nan memwa nou tankou Azor, Kessy ak tout lòt ki deja ale yo rete vivan nan memwa nou. Genyen mizik Azor ak kessy yon moun ka ap tande, chak fwa w tande l se tankou ou te tande l pou premye fwa paske mizik yo tèlman rich, yo toujou pote nouvèl enspirasyon ak entèpretasyon pou moun kap tande yo. Se menm bagay la pou Mario Chandèl. Chandèl vini, li fè travay li jan li te dwe fèl nan gou zansèt yo, epi li ale. Se konsa lavi tout bon sanba, tout bon alovi danbala dwe pase. Dezyèmman, tout vodouyizan konnen lè yon moun mouri, li vin pi vivan ke lè li tap viv pami nou. Lanmò se yon travèse. Mario pa mouri, li travèse”.
Ronald Edouard anpil moun konnen sou non Ronald Lakou, se yon zanmi defen Mario. Nou te gen chans fè yon ti pale ak li. Li fè kwè travay Mario yo ap toujou rete vivan. Men nou sipoze travay pou nou kenbe zèv li yo :”Pou lafwa mwen ak prensip zansèt yo mwen pa pral di Mario kite vid nan mouvman rasin nan paske Mario fè tan li epi li kite travay pou timoun kap vini yo kontinye fè. Kounya se devwa pa nou pou nou kontinye travay Mario, Kessy, Wawa, Azò , Sò Anne, Aboudja te komanse a. Mwen ajoute non sa yo se pou mwen raple kantite moun rasin nan pèdi. Nou sot pèdi Fernand nan lakou souvnans nou sot pèdi nègès Da, se pou mwen diw anpil fèy ka tonbe men rasin nan trè fon epi li anpil kidonk li pa ka tonbe”.
Mario Morose alyas Mario Chandèl te montre angajman li nan anpil mizik pami yo Ti bilan, Depa volontè, Kalewès elatriye. Daprè Dantès Aisha ak Ronald Lakou, Mario ap rete vivan atravè zèv li.
Marckenley Elie
©️ Tous droits réservés – Groupe Média MAGHAITI 2022.
World
Discussion about this post