Pou klotire ane 2018 la wo lè men, asosyasyon feminis: Ligues des Activistes pour l’Émancipation des Femmes (LAEF) te òganize yon kokenn chenn aktivite nan zòn ba latibonit la ak plis ke 50 fanm. Pami yo fanm k ap leve pitit poukont yo ak fanm pèdi mari yo.
Vita Pierre jenn Avokat, travayèz sosyal e militant feminis, yonn nan manm òganizatè yo pa kache satisfaksyon li pou jan aktivite a te byen dewoule. Daprè sa li rakonte: <<Ti rankont fin lane sa te rantre nan pèspektiv konsiltasyon, koute doleyans epi pran nòt pou biwo LAEF nan lide pou òganizasyon an redefini pwogram li pou nouvèl ane kap antre a. Yon mannyè pou akonpayman pi byen fanm milye rekile yo. Tankou sa ekri byen klè, objectif LAEF se rive integre tout fanm nan kad batay pou legalite ak rekonesans dwa byenèt tout fanm nan peyi dAyiti.
Pi lwen, li esplike anbisyon asosyasyon an, ki vle tounen ògan prensipal ki pou pote vwa fanm nan tout rakwen, viktim sistèm nan pou nou rive fouye kannal lotonomi ak lemansipasyon fanm yo nan mitan lasosyete a epi nesesite ki genyen pou fanm yo anvayi espas ki ta sanble intèdi pou yo, se yon lòt fwa pou fanm yo nan zòn rekile kòmanse pran leadership politik la tou.
Vita Pierre ki ap kowòdone pou yon dezyèm fwa aktivite LAEF yo nan latibonit fè kwè, travay sa se yon opòtinite pou li konprann chak jou nesesite pou abòde pwoblèm sosyal yo nan pèspektiv klas,
Paske tout lit yo, ofinal tounen nan rapò ” Gwo zouzoun ak madan sara”.
LAEF nan metodoloji li, itilize apwòch pliridisiplinè. Sa vle di, reyini fanm nan divès domèn epi ki sou tout teritwa nasyonal ak entènasyonal la pou ranfòse konbat san pran souf fanm yo ap mennen chak jou pou dwa yo respekte san paspouki.
Lesly Succès
Gonayiv-MAGHAITI
