Kowonaviris : Mo Kek Pwofesè nan Fakilte Syans Moun yo

Kowona Viris se epidemi sa a ki menase nou menm Ayisyen fi kou gason nan moman jodi an.Konsa li frape anpil lòt peyi deja ki fè epidemi si la pran grad pandemi dapre Oganizasyon Tout peyi yo sou latè nandomèn lasante an (OMS).

Men kèk konsèy nou ap pataje avè w ki ka ede w.

Nan kontèks sa a nou bezwen chache ekilib nou sou plan sikolojik,pou mantal ou ak sou plan sosyal  nan respè konsiy pou pwoteje tèt nou yo. Kòm nou konnen sa deja, apre mezi ofisyèl Leta a te pran nan mwa mas pase an, gen kèk aktivite ki sispann fonksyone, genyen lòt aktivite menm kantite tan pou yo fonksyone an vin diminye.Mezí sa yo mande anplis pou moun rantre lakay yo pi bonè nan aswè.Se mezi ki pran pou ankouraje n rete lakay nou.Se yo menm menm yo rele Konfinman bò isit nan peyi Dayiti. Men jan lekonomi an ak sèvis sosyal nou yo gen feblès, moun yo blije sòti pou al debàt ak lavi, bàt dlo pou fè bè.San mouvman sa yo moun yo p ap Kapab mete men nan bouch kèk fwa. “Rete lakay nou , pa sòti” Ki se sa nou rele Konfinman an pa gen menm sans pou tout sosyete, nan moman Kowona Viris lan kontinye ap vale teren preske toupatou sou latè. Nou pap chita sou feblès nou genyen yo pou fè neglijans ni pou bay legen.Konsa li enpòtan pou nou pataje ti konsèy sa yo ak ou nan lide pou ede w kenbe tèt ou e lespri w nan sitiyasyon sa a. 

1-Kisa pou nou fè nan sitiyasyon menas, laperèz ak bwouyay devan yon malè pandye ki ka rive frape yon bann moun anndan yon sosyete,tankou nan ka Kowona Viris lan? Repons lan se : li fasil pou anpil moun prèt pou pèdi tèt yo epi panike pou tikrik tikrak. Konpòtman sa yo nòmal pou rive pi vit lè n nan sitiyasyon panik tankou anfas menas Kowona Viris lan.Konsa jan nou reyaji an pa vle di nou se moun malad pou sa jous pou nou ta malad menm nan lespri nou.Nou pa delala pou sa tou ni ta menm gen maladi mantal pou sa a. Kisa ki pi enpòtan pou yon moun ki santi l nan sitiyasyon menas, nan panik ak laperèz ka fè menm? Repons lan se pa panse sèlman ak menas sa yo.Li enpòtan pou okipe lespri w ak lòt aktivite w ap fè tankou gade fim distraksyon pito, tande mizik ak pwofite lòt bagay ou renmen ki pap deranje konsiy ki bay yo pou pwoteje w kont Kowona Viris lan.Fè lekti se yon lòt aktivite sitou pou sila ki konn li yo.

2-Kouman pou kenbe relasyon ou ak lòt moun menm si gen konsiy kanpe ak distans lan? Nan moman sa a telefòn ak lòt rezo yo ap ede w konekte ak pwòch ou.Men evite pawòl, echanj ak foto ou ta wè ak ou ta santi k depaman ak konsiy ki bay yo.Chache tou gen nouvèl moun ki chè ak ou epi sitou moun ou pa  tande lontan. Rankont nanti gwoup 3 jouska 5 moun ka ede w ranfòse relasyon w ak solidarite ou bezwen nan moman menas Kowona Viris sa a men toujou nan respè mezi ak konsiy ofisyèl yo tabli yo.
 
Groupe de professeurs FASCH
Josué VAVAL et Hancy PIERRE

Comments

comments