Nan yon nòt konpayi telefonik Digicel sòti ayè lendi 3 oktòb la, li mande kolaborasyon popilasyon an pou pèmèt yo rive alimante espas estokaj li yo ak gaz. Konsa konpayi a konte sou sipò tout moun pou l ka kontinye bay sèvis.
Plis pase 5 semèn deja pase kote popilasyon an rete kanpe dèyè barikad yo, nan konsa okenn sikilasyon pa posib pou kèlkeswa konpayi a. Nan sans sa youn nan 2 Konpayi telefonik nan peyi a, Digicel, fè tout moun konnen kijan li difisil pou yo rive sèvi popilasyon an. Pandan tan sa, malgre barikad yo monte byen wo nan tout peyi a, Digicel fè konnen gen plis pase 300 anplwaye li ki ap travay chak jou nan santral li a, lajounen kou lannuit pou kenbe rezo a fonksyonèl.
Nan yon lòt bò gen anviwon 100 ekip lòt anplwaye ki sou tout teritwa a, pou asire bon jan fonksyonman rezo konpayi Digicel la. Nan nòt sila a, konpayi a fè konprann se gras ak ekip ijans sa yo ki fè 65 % rezo a an fonksyon jounen jodi a, nan objektif pou pote pi bon rezilta, yo pwomèt y ap travay san pran souf pou pousantaj la ka monte pi wo toujou.
Medya anliy yo, Bank yo, ak tout sèvis yo tankou apèl, voye mesaj, entènèt, transfè MonCash pap ka fonksyone pou konpayi sila a si li pa ka pase pou li mete gaz nan sant estokaj estratejik li yo.
Konpayi telefonik Digicel la di li konte sou sipò chak grenn moun pou tabli bon jan rezo nan tout zòn yo. Nan lòt ka a konpayi a fè konprann sa ka pi mal.
Atik sa se pwopriyete prive ©️ Gwoup Medya MAGHAITI 2022
