Komedyen “Sexy l’artiste” mouri asasinen nan zòn Nazon

Byen bonè jodi vandredi 3 mas 2023 a, komedyen ayisyen an ki rele Ralphe Théodore ta mouri anba bal moun yo pa rive idantifye nan zòn Nazon, selon sa yon pwòch fanmi viktim nan fè konnen.

Théodore tout moun konnen sou non “Sexy l’artiste” te vinn popilè an Ayiti nan kanaval gwoup ayisyen an “Chalè“, epi gras ak plizyè piblisite li te konn fè. Jodi a plizyè foto kadav li ap sikile sou rezo yo, kò l nan yon ma san.

Atis sa ki te jwenn anpil apresyasyon nan men popilasyon ayisyèn nan te vinn gen gwo akizasyon sou do l kòmkwa li ta fè pati baz gang 5 segonn nan Vilaj Dedye.

Jounalis ak animatè emisyon “Ti koze ak TT” a Theriel Thelus se premye moun ki ta pral site non jèn gason an nan koze gang.
Menm si enfòmasyon sa yo pa t janm konfime, Ralphe Théodore te fè yon sòti nan jounal Le Nouvelliste nan kòmansman mwa janvye a, pou l te di li pa enplike nan zafè gang.

N ap raple ayè jedi 2 mas la, nèg ak zam te anvayi plizyè zòn nan kapital la tankou Nazon, Solino, Delmas 24, elatriye. Kote plizyè moun oblije kouri abandone kay yo pou bandi pa touye yo. Men jouskaprezan, lapolis poko fè okenn deklarasyon sou ensidan sa a.

Atik sa se pwopriyete prive ©️ Gwoup Medya MAGHAITI 2023

Comments

commentaires