Minis defans Kanadyen an, Anita Anand anonse ayè jedi 2 mas 2023 a, bato Kanada te gen pou voye Ayiti yo rive. Objektif bato sa yo nan lanmè ayisyen an, se pou yo fè patrouy, epi gen plis enfòmasyon sou sa k ap pase yo sou lanmè a.
Jan premye minis kanadyen an, Justin Trudeau te anonse l depi 16 fevriye pase a nan 44yèm somè kominote Karayib la (CARICOM), responsab defans nan peyi Kanada a fè konnen bato sa yo debake sou dlo Ayisyen an.
“NCSM(Navire Canadien de sa Majesté) Glace Bay yo ak Monkton yo deja rive nan rejyon an“, se sa Anita Anand fè konnen sou kont twitè li. Li prezise misyon prensipal bato sa yo se pral fè patrouy nan lanmè a ak pati sou kote l yo.
Avèk nouvo aksyon sila, gouvènman kanadyen an fè konprann y ap batay pou tabli sekirite nan peyi a.
“Prezans yo ap pèmèt nou gen yon pi bon konesans sou sitiyasyon maritim lan, yo reprezante jefò nou pi rive tabli epi kenbe sekirite Ayisyen yo”, toujou daprè sa minis defans lan ekri.
Atik sa se pwopriyete prive ©️ Gwoup Medya MAGHAITI 2023
