K-dilak ak Bedjine se de (2) atis ki fè anpil siksè depi moman yo te sòti premye mizik yo ansanm kise “Fo pwomès”, aktyèlman yo gen yon mòso ki fenk sòti ki rele “pwomèt mwen”, yon mizik moun yo gentan gade plis pase de (2) milyon fwa nan sèlman sis (6) jou sou YouTube.
Men, dèyè tout siksè sa yo, genyen yon “beatmaker” ki pa te janm sispann travay pou li te ka rive pwodwi bèl melodi pou de (2) atis sa yo.
Bon non li se Manes Augustin, men li gen yon lòt ti non ki se El Magico. A chak fwa w ap danse sou yon melodi mizikal K-dilak oubyen Bedjine, panse ak non sa : El Magico, yon jèn gason ki nan ventèn, ki se moun Piyon, nan Nò peyi Dayiti.
El Magico se yon moun ki genyen eksperyans nan sa li ap fè a. “Mwen kòmanse jwe piyano depi lè mwen te genyen 11 lane, mwen vin kòmanse fè beat depi lane 2008-2009”, se sa atis la revele nou.
El Magico konfye Mag Haïti li rankontre ak atis K-dilak nan yon pwogram nan zòn Miragwan. Lè sa, K-dilak te nan yon gwoup ki rele RAS. “Mwen te jwe yon kanaval pou gwoup sila a, depi lè sa nou tou rete an kontak“.
El Magico se beatmaker K-dilak ak Bedjine. Se li menm ki travay tout mizik yo fè ansanm, ni sa yo pa fè ansanm yo. Se sèl mizik Engra, kote Bedjine chante ak K-dilak li pa te fè. Li te sèlman pase men ladan li pou li. “Mizik sa fèt lontan. Mwen sèlman fè yon ti pase men ladan li, paske mwen pa te vle kraze travay lòt beatmaker a te kòmanse fè“, se sa Manes Augustin di nou.
Anplis Bedjine ak K-dilak, El Magico travay ak anpil lòt atis tankou Shishie, Rutshelle Guillaume, Bruno Cho, Manno Beats elatriye. “Mwen travay mizik “M pa la ankò” Rutshelle la ak AKOUNA kote Manno Beats te rive ranpòte pri nan All African Music Awards. Mwen konn travay ak gwoup Chalè tou”, se sa El Magico fè nou konnen nan Mag Haïti.
Manes Augustin di nou “pa genyen anyen ki fasil. Yon Beatmaker sèlman bezwen pou atis yo valorize travay yo fè”. Li di nou yon beatmaker dwe konnen poukisa ak pou kiyès lap travay.
Beatmaker a presize se pa BUZZ ki fè yo dekouvri li. “Satisfaksyon mwen, se travay mwen. Menm si HMI la pa gen lajan, mwen swete fè sa ki genyen an“.
Nan kad entèvyou sa, El Magico mande pou chak jèn ki Beatmaker bay sa li ap fè a valè. “Mwen te di li deja, pa bay moun manti toujou respekte mo ou (sa w di moun) ,epi toujou bat pou ou fè mizajou nan domèn ou ye a paske chak ane moun yo anvi tande yon bagay diferan fòk ou toujou ap fouye,epi fòk ou sispann fè tèt ou plezi nan domèn nan, gade sa pèp la renmen epi ba yo li men sa pa vle di pou pa pwopoze“.
Se konsèy sa El Magico bay tout jèn k ap evoloye nan domèn lan.
Marckenley Elie
© Tous droits réservés – Groupe Média MAGHAITI 2021
World
Discussion about this post