Aprè li te fin sibi zak kidnaping jedi 4 avril pase a, metewològ Rudy Victor anonse jodi lendi 8 avril 2024 la, li jwenn liberasyon l. Nan mesaj li pibliye sou kont X (Twitter) li a, viktim nan voye mo remèsiman l bay chak moun ki kontribye nan mete l deyò jounen jodi a.
«Mèsi a tout moun ki te pataje, leve vwa yo pou mande pou m jwenn liberasyon mwen. Sa rive posib gras ak èd nou tout nan yon fason oubyen yon lòt», selon sa a espesyalis la fè konnen. Malgre se li menm ki bay enfòmasyon an sou kont pèsonèl li, Rudy Victor pa bay okenn detay sou kondisyon ki fè l libere aprè 4 jou nan men kidnapè yo.
Pou anpil pwòch kolaboratè Victor tankou sila yo nan SOS Haïti-Météo, se yon bon nouvèl puiske konfrè yo a ap kapab tounen nan fè travay ki gen rapò ak metewoloji a.
Atik sa se pwopriyete prive ©️ Gwoup Medya MAGHAITI 2023
