Atis angaje ayisyen Kémi Dread anonse vant-siyati, premye EP li ki gen pou tit ‘’Motivasyon’’ pou 2 avril k ap vini la, Kay Pucci nan Delmas 65. ‘’Jeneralman se anbyans lan k pral detèmine si ap gen pèfomans ou pa’’, se sa li fè konnen nan entèvyou li te genyen ak Mag Haiti sou diferan mizik ki konpoze EP sa.
“Motivasyon an se yon pwojè ki vrèman pèsonèl. Se yon EP ki tounen alantou m, obstak m jwenn sou wout mwen, menas, engratitid ak malveyans kèk moun nan antouraj mwen, ki nan kominote rap la m konn bay asistans pafwa’’, atis Kemi Dread te deklare. “Sa gen anviwon 2 lane yo te tante banm pwazon. 1 lane apre m te pran yon kout poud. Daprè sa m aprann se gwo kè ak jalouzi toujou pou atitid mwen nan Kominote a. M te di m pap dekouraje, m ap akouche pwojè a pou m degaje fristrasyon m’’.
Pwojè a gen 7 mizik sou li. Selon atis la ‘’preske tout se anchenman youn lòt’’. Premye track lan rele ‘’Kemi Part 2’’. “Li se yon swit prezantasyon m te fè deja sou Rale Maksi a ki toujou pale de pozisyon m ak konviksyon pa rapò ak ’’haters’’ yo’’, Kemi Dread te eksplike nou. Dezyèm track lan pote non ‘’Se pa pou Dat. “Ladan l m moutre m okouran de kèk pratik ak mannèv kèk nèg ap fè pou eseye tenyen m’’, se sa atis lan rakonte nan entèvyou nou te fè ak li sou sòti EP an.
Motivasyon, se tit twazyèm mizik sou EP an. Men tou, se tit pwojè sa. Ladan l, li eksplike maswife li monte epi prezante temwanyaj kèk moun ki fè l kontinye ap frape. Love the Pain, se sèl track ki pale de lanmou e ki gon ‘’feat’’ sou li. Li twouve l nan 4e pozisyon. ‘’Why You Hate’’, ki se 5e mizik lan bouske konnen poukisa tout rayisman sa yo kont atis lan. Gen ‘’#NoComments’’ ki se 6e track lan epi, dènye oubyen 7e nan pote non ‘’Jou M ap Kite Rap’’ .
Kisa piblik lan ap jwenn jou aktivite an?
“Piblik lan ap ka konsome pwojè a sou plas. Y ap gen posiblite fè yon seyans foto avè m. Epi ap gen yon kantite mayo ak postè k ap disponib tou. Gen kèk Atis nan kominote a k ap la tou pou ti bat bouch ak piblik lan’’, selon Kemi Dread.
Mag Haiti envite w viv kèk nan ‘’punchline’’ ki sou pwojè a.
“Rele M Kemi quoiqu’il advienne m gen pozisyon m frè
Kou Do Re Mi sou yon klavye disposizyon m klè
I keep it Real mande Kezo m Pa janm switch Frè
M fyè M fè sa m dwe fè ak kè san m pa voye flè’’.
“M fè doulè m yo sèvi m booster pou m fè fas ak demen
Regrè m yo tèlman anpil m fè yo sèvi m refren“ .
“M panse se moun yo k pral deside ki ‘’punchline’’ yo pi renmen”, Kemi Dread fè konnen. ‘’Jeneralman se anbyans lan k pral detèmine si ap gen pòfomans ou pa’’.
Kiyès Kemi Dread ye?
‘’M gen plizyè rezon k fè m te chwazi rele tèt mwen Kemi. Aprè kèk ane poz ak ansyen gwoup Klan Nèg Lari (KNL), m te deside kòmanse yon karyè solo, kote objektif la pa t menm, kote m ap grandi, m ap andose kèk responsablite libète. Li te endispansab pou m te chanje non tou. Se nan peryòd sa m te konn suiv Kemi Seba anpil tou. Lè m vin konn Kemi vle di nwa sitou nan lang ejipsyen an, m te di poukisa m pata chwazi l pou idantifye m tou’’, se sa li eksplike n sou rezon ki pousel chwazi non sa.
Pa ràpò ak sitiyasyon rap kreyòl lan twouve l jounen jodi an, Kemi pa vle di hip hop is dead tankou jan Nas te di l lan. “Men m pa vrèman gen twòp atant parapò ak rap nan jou yo la. M sèlman vle asire m m jwe patisyon pa m nan pandan m rete koyeran ak sa m ap di yo. Motivasyon an se vrèman yon pati nan mwen. Nenpòt moun ki tande ap gen yon minimòm enfòmasyon de pesonaj la”. Apre EP a li posib pou n jwenn yon dokiman ki pale de rap m gen kek lane m te komanse, m panse m ap konsakre plis tan pou m reyalize l petet lane k ap vini, atis lan anonse.
Steevenson Régulus se yon rapè ki gen pou non atis Kémi Dread. Li se pitit geto an. Paske l pase l anfans ak adolesans li nan Lasalin ak Fòtouwon. 2 blòk ki reprezante pou li sous enspirasyon ak espas aprantisaj atistik ak mizikal. Nan anpil nan mizik li yo, ou santi prezans divès espas sa yo. Dayè se pou sa wap wè mizik li marande ak kontestasyon, denonsyasyon ak militans.
Li grandi nan yon fanmi kote moun yo te renmen tande mizik ki charye revolisyon. Li etidye Mizik nan Lekòl nasyonal atizay – anpil moun konnen sou non Enarts. Men tou, li fè Fakilte Lengistik aplike kote l te rankontre anpil nan kòlaboratè l yo. Plis pase 3 lane aprè li te bandone KNL, – Ki se 1e gwoup li – li te pran inisyativ sòti an 2017, yon mizik ki rele ‘’Rale Maksi’’. Depi lè an, li pa sispann miltipliye kolaborasyon nan milye hip-hop lan.
Pou dekouvri atis lan: Youtube Kemi Dread
SoundCloud: Kemi Dread
© Tous droits réservés – Groupe Média MAGHAITI 2022
