Pou pwoteste kont gouvènman dominiken an, jounen lendi 21 novanm lan, Konpatriyòt ayisyen yo deside fèmen fwontyè ki separe Dajabon ak Ayiti. Aksyon sa rive paralize komès sou fontyè a enpi koz anpil Ayisyen pa ka antre nan peyi a, selon jounal Listín Diario.
Nan sousi pou fè vwa yo rive nan zòrèy otorite dominikèn yo, manifestan ki te sou fwontyè a denonse fason imigrasyon ap maltrete migran ayisyen yo. “Manifestan yo denonse move tretman nan pwosesis depòtasyon Repiblik Dominiken tanmen kont moun ki iregilye yo nan peyi a”, daprè sa Listín Diario rapòte.
Pandantan sa, jounal la soulinye Ayisyen ki t ap manifeste jounen lendi 21 novanm lan, te kole plizyè pankat ki vize Prezidan dominiken an, Luis Abinader san bay plis detay sou sa.
Bò kote manifestan yo, yo asire pòtay ki separe fwontyè ayisyen an ak fontyè dominiken an ap rete fèmen pou yon tan ki pa fikse, daprè sa Diaro Libre, ki se yon jounal dominiken tou mansyone.
Atik sa se pwopriyete prive ©️ Gwoup Medya MAGHAITI 2022
