Jonas Gustave se non yon jenn gason ki pa janm sispann konbat enfliyans bandi yo sou rezo sosyal yo. Sa fè 4 lane depi li deside mennen yon batay avèk youn nan zam legal ki puisan nan monn lan ki se lapawòl. Li pa janm sispann denonse yo ak tout fòs li, sitou tout vye pratik bandi yo gras ak chènn Youtube li ki pote non (Gustave Jonas aka Timaroka).
Chenn Youtube Jonas Gustave la gen 95.4 k moun k ap suiv li, anplis pou kounya li gen 687 videyo sou paj sa. Pami tout videyo sa yo, genyen ki konn genyen plis pase 40 mil moun ki gade yo ak yon dividal kòmantè san rete. Chak fwa lapolis tiye yon bandi oubyen lè bandi tire yon lòt, Ti Mawoka toujou monte andirèk pou li fè anons lan epi lage eslogan li an ki se: “Vinn mete erè bò zago ti zwazo sa”.
Listwa li kòmanse nan Vilaj Dedye, kote li te rive grandi nan yon zonn ki rele Izrayèl. Tankou yon sitwayen nòmal, Jonas te deside mennen yon vi senp ak metye li ki se reparasyon klimatizè. Menmsi tout moun konnen ki move repitasyon zonn sa genyen ak koze gang lan, Jonas Gustave di “li pa te janm nan gang menm yon fwa nan vi li“. Se konsa li kòmanse grandi ak mennen lavi li kou wè tout yisyen ki onèt epi ki gen diyite.
Jenn gason sa se te yon bòs klimatizè ki pa te janm sispann goumen ak lavi pou yon demen miyò nan Vilaj la. Tout moun konnen li sou non Ti Mawoka, yon non ki sanble ak ti mawozo. Koz nan epòk sa, se te fawouch tout bòs klimatizè yo ki te channmas oubyen nan ri dèkazenn ki te konn ap fè blag ant yo menm. Se te konsa non Ti Mawoka a tou rete pou li. Se youn nan rezon ki fè chenn Youtube li a se non sa li pote” Gustave Jonas aka Timawoka“
Jonas di li te menm jan ak majorite tout jenn gason nan epòk sa, li te renmen fanm anpil epi se akoz sa bandi yo ta pral ba li pwòblèm nan katye a.
“Premye baz ki te manke touye m se yon baz ki te alye ak Baz Pilat. Yo te atake m se pou yon fanm ki pa te menm mennaj mwen, men demwazwèl la te vin fè frekan ak nou nan moman an epi nou te joure l. Jenn fi sa te gen nèg li nan baz la epi li kouri al pot plent pou nou, apre sa nèg li vini ak zam li pou li vin fè demonstrasyon. Li te ban m kalòt, li te rale zam sou mwen pou li te ale avèk mwen nan lide pou li tire m bò lanmè a”, se sa Gustave Jonas di nou.
“Lè sa mwen te di li si l ap tire m se pou l fè sa bò lakay mwen devan tout moun. Aprè sa mesye yo vin bay vag lè yo te wè plizyè moun anvayi yo. Paske, baz Pilat la toujou vle fè moun konprann yo menm yo pa vle fè moun abi, epi moun k ap dirije baz la pa te okouran. Se te ti solda ki te ap regle zafè pa yo ak mwen“. Toujou pawòl Jonas.
“Akoz pèsekisyon sa yo, mwen te fini pa kite Vilaj Dedye, mwen te vin al rete kafou, aprè Petyonvil, mwen te vin lage nan sere, paske mwen pa te vle kwaze ak bandi sa yo. Men tout mezi sa yo pat sifi, paske mwen te gen obligasyon desann channmas pou mwen te ka ale travay. Yo te konn ap suiv ak fè tantativ plizyè fwa pou yo te elimine m“.
Gustave Jonas te oblije kite peyi al rete nan peyi etranje, pou li te ka sove po li akoz nan epòk sa li te vin gen anpil menas ak gwo malè ki te pandye sou tèt li.
“Lè manmanm ap pran nouvèl la nan bouch moun ki konnen m, manman m ki te nan peyi etranje, li te kòmanse ban m chalè pou mwen te kite peyi a, pou m byen di n nan epòk sa, mwen te gen plizyè lennmi akoz m te jenn epi mwen te konn ap plede renmen ak plizyè fi, pami medam sa yo genyen ki te konn ap tcheke avèk bandi yo tou, sila sa yo depi yo fache sèl opsyon yo se zam nan yo konnen, sa se youn nan rezon ki fè m te oblije prese vit chape po m kite Ayiti tou“
Aprè Jonas fin kite Ayiti, li rakonte nou kijan li te an kòlè kont sa ki te rive li a, li te deside pa rete nan silans li, kòm rezo sosyal yo se youn nan pi bon mwayen pou di sa ki fè nou mal, pandan nou lwen ak lòt moun.
Jonas di nou : “li te tou pwofite kreye chenn Youtube li ki pote non li epi ki kole ak ti non jwèt li tou“.
“Lè m te fin kite Ayiti mwen te vin ap denonse tout bagay Baz Pilat yo te konn ap fè mwen sibi, paske mwen te gen yon nostalji ki te melanje ak yon kòlè ki te vin fè m kreye Chenn Youtube mwen an. Fanatik te menm rive di m mwen te nan Baz Pilat lè m te vin ap denonse bandi sa yo, yo te di se volè mwen ye, se nan baz yo mwen te ye, ki fè m paka denonse lot nèg yo. Aprè sa mwen deside pa fokis sou Baz Pilat la sèlman, mwen kòmanse pale sou tout gang ki anpeche pèp Ayisyen viv, tankou Kris La, Ti Lapli, nèg Site Solèy yo, neg Bèlè yo elatriye”.
Lè nou mande Jonas: Eske li pa konn pè pou lavi li ak vi li, sitou sa ki rete Ayiti yo?
li te reponn ak mo sa yon ki anba a.
“Wi mwen konn pè pou vi m, men nou viv ak tout laperèz, paske nou abitye avèk li. li vin kou yon zanmi pou nou, sa vle di mwen konnen kòman pou m jere sa, m toujou di se pa pè a ki pral fè mwen pa mouri, mwen paka di li pa nan mwen, men mwen eseye metrize li ak kanalize li anndan m pou mwen manevre li”.
“Mwen te yon nèg ki te ka bandi, paske mwen te gen opsyon an devan m, mwen te gen plizyè rezon pou m te ka sa, koz nèg yo te bat mwen ak ban m kalòt, mwen te ka vle tire revanj, men mwen te di m ap denonse yo, mwen denonse yo“.
Pi gwo konsèy Jonas di li te ka pote pou pèp Ayisyen an, se denonse bandi yo, pa janm sitire yo. Tout moun ki sibi ak sila yo ki pa sibi pa dwe janm sispann denonse, paske se denonsiyasyon an ki pi bon mwayen an pou pèp la.
Atik sa se pwopriyete prive ©️ Gwoup Medya MAGHAITI 2022
