Anbasadè «Guinée équatoriale» la Anatolio Ndong, te fè konnen nan moman reyinyon ayè lendi 19 jen 2023, nan konsèy ekonomik ak sosyal nan Òganizasyon Nasyonzini (ONU), li pote tout solidarite l avèk peyi Dayiti. Li te pwofite fè konnen peyi a bezwen bon jan èd selon medya AhoraEG.
«Se kounya ak bon moman pou n voye èd ak asistans pou peyi Dayiti parapò avèk demann li. Akoz, mwatye Ayisyen ap mouri grangou, sitou dènyè inondasyon yo ak glisman teren, aprè tranbleman tè te deja anvlimen sitiyasyon moun yo», selon deklarasyon anbasadè Anatolio Ndong Mba, nan konsèy Òganizasyon Nasyonzini sou Ayiti.
Sou lòtbò a, minis planifikasyon ak koperasyon Ricard Pierre, te pral remèsye anbasadè «Guinée équatoriale», parapò avèk pawòl li yo epi envite kominote entènasyonal la pou li soutni Lapolis Nasyonal Dayiti nan lide pou l ka fè fas avèk ensekirite gwoup gang yo enpoze peyi a. «M mande yon pi gran Koperasyon teknik ak finansye pou Agrikilti a nan objektif pou n ka pwodui aliman baz yo epi kreye anplwa nòmal», selon minis planifikasyon ak koperasyon an Ayiti a.
Alòske, prezidan konsèy ekonomik ak sosyal (ECOSOC) la Lachezara Stoeva, te pral pran lapawòl pou li fè konnen plan repons imanitè nesesite 719 milyon dola ameriken, plis pase oubyen doub fwa montan ane 2022 ki sot pase la.
«Deklarasyon reprezantan Guinée équatoriale mete an evidans konpòtman solidarite l te gen pou peyi Karayib an 2010, sitou avèk Ayiti aprè gwo tranbleman tè, kote li te pral pote pou nou 3 milyon dola Ameriken kòm soutyen ak solidarite», nan pawòl prezidan ECOSOC la nan konsèy Òganizasyon Nasyonzini (ONU).
Atik sa se pwopriyete prive ©️ Gwoup Medya MAGHAITI 2023
