Gouvènman kanadyen anonse jodi vandredi 24 mas 2023 a, li sanksyone ansyen senatè depatman Nip la, Nenel Cassy ak ansyen kandida pou laprezidans Steeve Khawly, akoz yo se 2 moun pami lòt yo k ap kontribye nan alimante ensekirite ak vyolans jounen jodia nan peyi an.
Sanksyon sa pral gen pou konsekans sezi byen ak lajan yo epi entèdi yo vwayaje peyi Kanada, se yon desizyon ki elaji sou lis 19 moun nan peyi an ki gentan touche anba sanksyon deja, keseswa sektè ekonomik ak politik. Kòmkwa sila sa yo ta enplike nan finansye aktivite kriminèl ak koripsyon anndan peyi an.
Sou lòtbò a Kanada di l ap kontinye envesti nan pwojè ede Ayiti sou plan entènasyonal, tankou nan domenn sante, edikasyon, batay kont koripsyon ak enpinite, batay pou kwasans ekonomik la ak chanjman klimatik yo.
Alòske gouvènman kanadyen an gentan angaje l pou li mete 98 milyon dola Ameriken kòm èd finansyè pandan egzèsis fiskal 2022-2023 epi prevwa pou li mete anviwon 100 milyon dola Ameriken pou fourni Ekipman epi soutni Polis Nasyonal Dayiti a.
Anplis, Kanada di l ap kontinye egzèse presyon sou sila yo k ap finanse gang ak vyolans ensekirite an Ayiti epi mete sanksyon sou yo, pandan l ap kontinye aplike nan rejim sanksyon Konsèy Sekirite Nasyonzini an.
Atik sa se pwopriyete prive ©️ Gwoup Medya MAGHAITI 2023
