Minis afè etranjè peyi Kanada Mélanie Joly, anonse jodi lendi 5 desanm 2022 a, nan yon kominike, gouvènman peyi Kanada a pran sanksyon kont Gilbert Gibio, Reynol Deeb epi Sherrif Abdallah.
Sanksyon sa yo vini nan yon fason pou fè presyon sou tout moun ki responsab sitiyasyon peyi Dayiti ap fè fas kounya, daprè kominike a.
«Dènye sanksyon sa yo vize twa(3) manm wo plase nan elit ekonomik nan peyi Dayiti ki se Gilbert Gibio, Reynol Deeb epi Sherif Abdallah, nou mete entèdiksyon sou tranzaksyon yo sa k ap penmèt nou jele tout sa yo ta posede nan peyi Kanada.» daprè sa minis lan fè konnen nan kominike sila a.
Toujou daprè sa Mélanie ekri, li fè konprann peyi l ap dirije ladan l lan gen tout rezon pou kwè Gibio, Deeb, ak Abdallah se twa nan sitwayen enfliyan ki nan zafè ekonomik nan peyi Dayiti, ki pwoteje epi pèmet gang yo jwenn mwayen pou regle zafè ilegal anndan peyi a, gras ak blanchiman lajan epi lòt zak kòripsyon.
«Menm jan gouvènman Kanada a te sanksyone ansyen dirijan politik nan peyi a, jounen lendi 5 desanm sa, minis afè etranjè peyi Kanada Mélanie Joly, anonse non 3 lòt moun sa yo ki ajoute nan lis 8 moun yo te deja sanksyone nan jou pase yo. Desizyon sa yo pran se pou fòse moun ki responsab sitiyasyon vyolans ak enstabilite an Ayiti yo sispann bay gang yo lajan ak zam.»
“Sanksyon peyi Kanada enpoze yo se pou fè presyon sou moun ki responsab vyolans ak enstabilite aktyèl an Ayiti. Moun sa yo dwe sispann bay gang kriminèl yo lajan ak zam an Ayiti”, se sa minis lan soulinye.
Nan yon lòtbò responsab la envite pati politik nan peyi a pou chita kò yo, pou jwenn yon akò politik k ap penmèt nou jwenn bout kriz plizyè fasèt Ayiti ap fè fas la. Nan yon lòtbò, li mande pou kominote entanasyonal a suiv egzanp peyi l la, pou enpoze sanksyone kont gang yo ak tout akolit ki asosye ak yo. Sa yo ki daprè Mélanie se sèl mwayen ki ka mete estabilite, sekirite epi retabli demokrasi nan peyi sa a.
Atik sa se pwopriyete prive ©️ Gwoup Medya MAGHAITI 2022
World
Discussion about this post