Nan Yon dokiman planifikasyon entèn peyi Etazini NBC News te konsilte, jounal la fè konnen administrasyon Biden lan gen plan pou migran ayisyen yo ki ta vle debake pa pil e pa pakèt pou antre nan peyi Etazini.
Daprè NBC News dokiman ameriken sa mete aksan sou 2 bagay, youn se diskisyon sou plizyè opsyon y ap gen pou yo panse sou li, lòt la se posiblite pou gouvènman ameriken an mete migran sa yo nan prizon tanporè nan yon peyi asosye, oubyen devlope kapasite yon pati nan enstalasyon prizon Guantanamo, ki nan peyi Kiba a.
“Anpil plan ap etidye pou double kapasite sant operasyon pou migran yo k ap gen 400 kabann “, daprè sa jounal la fè konnen dokiman an site. Yo presize tou sant operasyon sa yo se nan prizon Guantanamo yo ye, men yo pa fè pati prizon ki fèt pou prezime teyoris yo.
Previzyon sa yo fèt se paske gouvènman ameriken an estime depi gaz la debloke, migran yo ap gen posiblite pou vwayaje pou antre nan peyi yo a.”Administrasyon Biden lan prevwa, lè gaz la pa bloke ankò, migran yo ap kapab achete gaz pou mete nan bato yo. Sitiyasyon sa ka fè gen anpil migran ayisyen pral eseye vwayaje sou lanmè pou rive Etazini“, daprè deklarasyon responsab ameriken yo.
“Nou pa wè okenn ogmantasyon nan migrasyon maritim Ayisyen an enpi pa gen okenn desizyon ki pran. Pou m di byen kantite Ayisyen ki gen entèdiksyon pou vwayaje sou lanmè a diminye nèt pandan mwa sa yo“, toujou daprè yon wo responsab ameriken. Li te kontinye pou l di “sa gen bon lontan depi gen plan ijans ki prepare, se pou si ta gen ogmantasyon nan migrasyon maritim lan“, selon eksplikasyon jounal NBC News bay.
N ap raple sa gen 14 mwa depi polisye sou Fontyè Teksas la te maltrete anviwon 12 000 mil migran ayisyen ki te pran refij yo anba pon Tekzas la. Sitiyasyon sa ta pral lakoz gouvènman Biden lan te resevwa anpil kritik pou fason l te jere migran sa yo.
Photo: Le Parisien
Atik sa se pwopriyete prive ©️ Gwoup Medya MAGHAITI 2022
World
Discussion about this post